गफै हो त सम्धी?

कुम जुँगाले चिन्न थाले, गफै हो त सम्धी?
सबैले जुँगा किन पाले, गफै हो त सम्धी?

पानी जहाज ल्याउन राजधानीमा खोजेको
आफ्नै मितले पनि गाले, गफै हो त सम्धी?

दौँतरीको भर परे फाल्छन् बोकी भिरमा
गरेस् विचार भन्थे बाले, गफै हो त सम्धी?

धेरैले मनाए रमाइलो घुर्ने थलो भत्काउँदा
लुच्छ्न् क्यारे रातो भाले, गफै हो त सम्धी?

बालुवाको दुईवटा खम्बा एउटै बनाउँ भनेको
कुहिएका भेट्नाले ढाले, गफै हो त सम्धी?

मेरै राडी मेरै काम्लो मेरै जिउमा के बुरबुर
बैगुनीलाई पाखामा फालेँ, गफै हो त सम्धी?।।

जस्को कटेरो उस्को पुच्छर बाहिर पो पारे
हेर्दा नकचरा देख्दै छाले, गफै हो त सम्धी?

टपरी मेरो ताक्नेलाई दोबाटोमा मन्छिदा
अड्डामा गइ नालिस हाले, गफै हो त सम्धी?