वीरगञ्ज– ट्रकमा लोड गरिएको १ क्विन्टल ५ किलो गाँजासहित ७ जना वीरगञ्जबाट पक्राउ परेका छन्।
गाँजासहित पक्राउ पर्नेमा ट्रक चालक मकवानपुर हेटौँडा उपमहानगरपालिका वडा नम्बर १९ बस्ने ३२ वर्षका लक्ष्मण सिटौला, २४ वर्षका विजय तामाङ, १८ वर्षका प्रभात तामाङ, कलैश गाउँपालिका १० बस्ने २६ वर्षका रामलाल गोले, धादिङ जिल्ला बेनिघाट रोराङ गाउँपालिका १ बस्ने ३७ वर्षका निरज लामा, चितवन राप्ती नगरपालिका २ बस्ने ५० वर्षका रानुलाल तामाङ र पर्साको सखुवा प्रसौनी गाउँपालिका ३ बस्ने ५१ वर्षका सहिद मियाव आलम रहेका छन्।
वीरगञ्ज महानगरपालिका वडा नम्बर २१ स्थित लालपर्सा जाने बाटोमा ना ६ ख ६५२५ नम्बरको ट्रकमा लोड गरिएको अवस्थामा उक्त परिमाणको गाँजा प्रहरीले बरामद गरेको हो।
लागुऔषध नियन्त्रण ब्यूरोबाट खटिएको प्रहरी टोलीले ट्रकमा ७ वटा पोकामा १५ केजीको दरले गाँजा लोड गरिएको अवस्थामा बरामद गरेको हो।
गाँजासहित पक्राउ परेका सातैजनालाई प्रहरी हिरासतमा राखी लागुऔषध कसुर सम्बन्धी शीर्षकमा मुद्दा दर्ता गरी आवश्यक अनुसन्धान भइरहेको जिल्ला प्रहरी कार्यालय पर्साले जनाएको छ।
भर्खरै
लोकप्रिय
