काठमाडौँ- प्रधानमन्त्री कप क्रिकेट प्रतियोगितामा मंगलबार प्रदेश-२ ले लुम्बिनी प्रदेशसँग ७७ रनको हार ब्यहोरेको छ। २ सय ५८ रनको लक्ष्य पछ्याएको प्रदेश दुई ४२.४ ओभरमा एक सय ८० रनमा समेटिएको थियो।
लुम्बिनीलाई सस्तोमा समेट्न अनिल खरेलले चार तथा विक्रम भुसाल र दीपेन्द्र रावतले दुई दुई विकेट हात पारे। कृष्ण कार्की र अमित तामाङले एक एक विकेट लिए। प्रदेश-२ का विवेक यादबले सर्वाधिक ५१ रन जोडे। सुधिर चौधरीले ४२ र मेहबुब आलमले ३१ रन जोडे। हरिशंकर शाहले पनि २२ रन बनाए। कप्तान सुरज कुर्मी ८ रनमा सिमित भए।
प्रदेश-२ ले पहिलो विकेटका लागि ३२ र तेस्रो विकेटका लागि ४९ रनको साझेदारी गरेको थियो। एक सय ५ रन जोड्दा दुई विकेट मात्र गुमाएको प्रदेश-२ ले सोही अवस्थामा मेहबुबलाई गुमाएपछि लगातार दबाबमा आएको थियो। अमितले उनलाई आउट गरेका थिए। त्यसपछि थप १८ रनको फरकमा उसले ६ विकेट गुमायो।
अन्तिम विकेटका लागि प्रदेश-२ ले ५६ रनको साझेदारी गरेको थियो। अनिलले १० ओभरमा २ मेडन राख्दै २९ रन खर्चिएका थिए। त्यसअघि लुम्बिनीले निर्धारित ५० ओभरमा ९ विकेट गुमाएर २ सय ५७ रन जोडेको थियो। लुम्बिनीका सन्दिप रजालीले ८९, सौरभ खनालले ५६ र विक्रम भुसालले ३६ रन बनाए।
रजाली र खनालले चौथो विकेटका लागि ९५ रनको साझेदारी गरेका थिए। लुम्बिनीले ४२ रन जोड्दा तीन विकेट गुमाइसकेको थियो। प्रतियोगितामा लुम्बिनीले विजयी सुरुवात गरेको हो। प्रदेश-२ को पनि पहिलो खेल थियो।
भर्खरै
लोकप्रिय
