छुटे कति कति

ढुकुटीमा प्वाल पारि लुटे कति कति।।
बोलौँ भनि मुख खोल्दा कुटे कति कति।।

खान्की खाली रहँदा भर्ना भरतालमा
भागवण्डा गरौँ भन्दा जुटे कति कति।।

लुछाचुँडी गरि गरि तँछाड मँछाडमा
आफ्नै भाँडा चर्किएर टुटे कति कति।।

पट्टी बाँधी आँखामा डण्डा चलाउँदा
घ्याम्पा थिए माटाका फुटे कति कति।।

झिँजाले पोल्यो मुढो नपत्याउने गरि
त्यसैमा हाँडी तताइ भुटे कति कति।।

मैहुँ भन्ने आए लामो पुच्छर देखाइ
नाक छोपी हिँड्न थाले ठुटे कति कति।।

हिजोसम्म काम्लामा सातु मोली खान्थे
शहरमा घरजाम गर्ने बुटे कति कति।।

यसो गर्छु उसो गर्छु भनि झुक्काइ वरि
गफै गफको पठुवा चुटे कति कति।।

ठगी चोरी बेइमानी पर्खाल भित्र थिए
कुरो मिलाइ दिवसमा छुटे कति कति।।