नवलपरासी – नवलपुर (बर्दघाट– सुस्तापूर्व) मा १४ जना कुष्ठरोगी भेटिएका छन्। जिल्ला स्वास्थ्य कार्यालयका अनुसार पहाडी क्षेत्रमा पर्ने तीन गाउँपालिकाबाहेक सबै स्थानीय तहमा कुष्ठरोगका बिरामी भेटिएका छन्।
स्वास्थ्य कार्यालयका कुष्ठरोग स्रोत व्यक्ति वीरबहादुर श्रेष्ठका अनुसार साउनदेखि फागुनसम्म कुष्ठरोगी भेटिएका हुन्।
मध्यविन्दु नगरपालिकामा दुई महिलासहित पाँच, गैँडाकोट नगरपालिकामा दुई महिलासहित चार र देवचुली नगरपालिकामा एक महिलासहित तीन जना कुष्ठरोगी भेटिएका हुन्।
यस्तै, कावासोती नगरपालिका र विनयी त्रिवेणी गाउँपालिकाका एक–एक पुरुषमा कुष्ठरोग देखिएको छ। हुप्सेकोट, बुलिङटार र बौदिकाली गाउँपालिकामा भने कुष्ठरोगी फेला परेका छैनन्।
यसअघि नवलपुरमा १६ कुष्ठरोगी सम्पर्कमा आएकामा उनीहरूको उपचार गरिएको श्रेष्ठले बताए। कतिपय कुष्ठरोगी सामाजिक विभेदका कारण थाहै नदिई घरमा बस्ने गरेका श्रेष्ठले बताए।
नवलपुरलाई कुष्ठरोगमुक्त जिल्ला बनाउने अभियान सञ्चालन गर्ने तयारी भइरहेको छ।
छालामा रातो फुस्रो दाग देखिने, छाला नदुख्ने, गिर्खा आउने, अनुहारको छाला रातो र चम्किलो हुने, कानको लोती बाक्लो हुने, आँखा झिम्काउन नसकिने, शरीरको कुनै भागमा छोएको थाहा नहुने, हातखुट्टा लत्रिनेजस्ता कुष्ठरोगका लक्षण हुन्।
भर्खरै
लोकप्रिय
