काठमाडौँ – नेपालमा २ करोड ५० लाख जनसंख्यामा इन्टरनेटको पहुँच पुगेको पाइएको छ।
नेपाल दूरसञ्चार प्राधिकरणले सार्वजनिक गरेको चालु वर्षको पछिल्लो सात महिना (साउन–माघ)को तथ्यांकअनुसार नेपालमा २ करोड ५४ लाख १९ हजारभन्दा बढी जनसंख्याका पहुँचमा इन्टरनेट सेवा पुगेको हो।
पुस महिनाको तुलनामा माघमा ६ लाख ८३ हजारभन्दा बढी इन्टरनेट प्रयोगकर्ता थपिएका छन्। पुससम्म दुई करोड ४७ लाख ३५ हजार ६५० जनाको पहुँचमा इन्टरनेट सेवा पुगेको छ। कुल जनसंख्याको ८४ प्रतिशत जनताका पहुँचमा इन्टरनेट सेवा पुगेको तथ्यांकमा उल्लेख छ।
प्राधिकरणले जनसंख्या प्रक्षेपण २०११–२०३० लाई आधार मानेर उक्त प्रतिवेदन तयार पारेको हो। प्रतिवेदनमा प्राधिकरणले नेपालको कुल जनसंंख्या २ करोड ९८ लाख ७६ हजार ५३१ लाई आधार बनाएको छ।
प्राधिकरणका अनुसार सबैभन्दा धेरै योगदान मोबाइल इन्टरनेटको रहेको छ । माघसम्म मोबाइल इन्टरनेटको हिस्सा ६१ दशमलव ४७ प्रतिशत छ।
एक करोड १३ लाख बढीको पहुँचमा थ्रिजी इन्टरनेट पुगेको र यसमा सबैभन्दा धेरै नेपाल टेलिकमको ८६ लाख ६० हजार र एनसेलको २४ लाख ९१ हजार रहेको छ । त्यस्तै फोरजी प्रयोगकर्ता ७० लाख ९२ हजार र इभिडियो प्रयोगकर्ता एक लाख ३६ हजार ५७३ छन्।
फोरजी प्रयोगकर्तामध्ये सबैभन्दा धेरै एनसेलका छन् । माघ मसान्तसम्म एनसेलका फोरजी प्रयोगकर्ता ४३ लाख २५ हजार ९३६ रहेका छन्।
नेपाल टेलिकमका फोरजी प्रयोगकर्ता २५ लाख ४४ हजार ७२४ र स्मार्ट टेलिकमका दुई लाख २२ हजार छन्।
फिक्स ब्रोडब्याण्डको हिस्सा २१ दशमलव ८५ प्रतिशत छ।
यसमा एडिएसएलका आठ लाख ३७ हजार र एफटिटीएच इन्टरनेट प्रयोगकर्ता ५७ लाख ६८ हजार छन् ।
भर्खरै
लोकप्रिय
