टिलो हुन्छ पछि

कुर्सिबाट पछारिँदा निलो हुन्छ पछि
मुटु भित्र ठोकिएको किलो हुन्छ पछि।।

बेलैमा थन्को मन्को गर्दा जाती होला
आलरामको भर पर्दा ढिलो हुन्छ पछि।।

पम्पु लगाइ फुलेको सारो हुन्छ बहुत
पंचर भइ हावा जाँदा गिलो हुन्छ पछि।।

अर्काले भिराएको नौलो चलन ल्याउँदा
निचोर्दा पनि नफोरिने पिलो हुन्छ पछि।।

जस्ले पायो उस्ले खायो बेला बखतमा
मुख तिर दल्दै खेल्ने हिलो हुन्छ पछि।।

कुखुरा बेच्दा कर उठाइ बटुलेको रकम
बाँडिचुँडी पोली खाने बिलो हुन्छ पछि।।

जति सक्यो बटुल्छन् हातमा डाडु हुँदा
छाप बेसाउन खाँचोमा जिलो हुन्छ पछि।।

फुकादाम देखे पनि जिब्रो तन्काइ टिप्ने
ढिकुरोमा काम लाग्ने टिलो हुन्छ पछि।।