बागलुङ – बडिगाड गाउँपालिका–९ मालारानीमा कुखुरा खान खोरमा पसेको चितुवालाई स्थानीयले छोपेर सकुशल छाडिदिएका छन्।
बिहीबार बिहान ४ बजेतिर स्थानीय दिलबहादुर थापाको घरमा रहेको कुखुराको खोरमा छिरेको चितुवालाई दिउँसो नियन्त्रणमा लिइएको हो।
लखेट्न खोजे पनि अटेर गरेर खोरमै बसेको चितुवा पछि आफैँ निस्केर मानिसहरू झुम्मिएको ठाउँतिर आएपछि गाउँले मिलेर समातेका थिए।
खोरबाट भगाउन जम्मा भएकाहरूमाथि झम्टन आएको चितुवालाई हातैले समातेर नियन्त्रणमा लिइएको स्थानीय युवा राजन पाइजाले बताए। ‘चितुवा एक्कासि हामी भएतिर आयो, म, दीपक केसीलगायतका साथी भएर समात्यौँ,’ पाइजाले सुनाए।
चितुवासँग भिड्दा नंग्र्राले खुट्टामा सामान्य घाउ लागेको र कपडा च्यातिएको पाइजाले बताए। उनले जीवनमा पहिलोपटक चितुवासँग आमनेसामने भएको उल्लेख गरे।
करिब दुई वर्षको चितुवालाई जनप्रतिनिधि, प्रहरीलगायतको रोहवरमा घटनास्थलदेखि तीन किमि टाढा रानीवनमा लगेर छाडिएको सब डिभिजन वन कार्यालय बडिगाडका फरेस्टर दीपकबहादुर श्रीस थापाले जानकारी दिए।
भर्खरै
लोकप्रिय
