सौराह – एमाले १०औँ महाधिवेशनअन्तर्गत अहिले चितवनको सौराहमा मतदान गर्ने क्रम जारी छ। सौराहस्थित सेभेन स्टार होटल परिसरमा विद्युतीय माध्यमबाट मतदान गर्न एमाले महाधिवेशन प्रतिनिधिहरु लाम लागेका छन्।
मंगलबार बिहान ९ बजेसम्म करिब एक हजार ६०० जना महाधिवेशन प्रतिनिधिहरुले मतदान गरेका छन्। जसअनुसार अझै ५०० बढीले मतदान गर्न बाँकी रहेको छ। एमाले महाधिवेशनमा २ हजार १५३ महाधिवेशन प्रतिनिधि सहभागी भएका छन्। जसमध्ये महाधिवेशन लम्बिँदा १०० जना जति प्रतिनिधिहरु मतदान नै नगरी घर फर्केको अनुमान गरिएको छ।
विद्युतीय माध्यमबाट मतदान गर्न एकजना प्रतिनिधिलाई बढीमा आधाघन्टा समय लागेको छ। मतदानमा करिब ७० वटा विद्युतीय मेशिनको प्रयोग भएको छ। जसले गर्दा मतदान प्रक्रिया पूरा हुन अझै डेढ घन्टा समय लाग्ने अनुमान गरिएको छ।
मतदानपश्चात मतगनणा कार्य अघि बढ्ने निर्वाचन आयोगका अध्यक्ष विजय सुब्बाले जानकारी दिए। उनले आजै मतदानको परिणाम सार्वजनिक गर्दै महाधिवेशनको विधिवत समापन गरिने बताए।
केपी शर्मा ओलीले घोषणा गरेकोभन्दा बढी आकांक्षीले उम्मेदवारी दर्ता गरेपछि एमालेको १०औँ महाधिवेशनमा निर्वाचन भएको छ। सर्वसम्मत नेतृत्व चयनको लागि प्रयास भए पनि त्यो सफल भएन। एमालेको वरिष्ठ उपाध्यक्ष, महासचिव र उपमहासचिवलगायत केही केन्द्रीय सदस्य निर्विरोध निर्वाचित भइ पनि अध्यक्ष, उपाध्यक्ष र सचिव तथा केन्द्रीय सदस्यमा आवश्यकभन्दा बढी उम्मेदवारी परेपछि निर्वाचनमार्फत निर्णय गरिने लागेको हो।
अध्यक्षमा केपी शर्मा ओली र भीम रावलले उम्मेदवारी दिएका छन्।
भर्खरै
लोकप्रिय
