कुश्मा – विभिन्न एड्भेन्चरलगायत विश्वकै दोस्रो अग्लो बन्जी सञ्चालन गरिरहेको द क्लिफ प्रालिको रिसोर्ट परिसरमा विश्वकै अग्लो र लामो व्यवसायिक स्काइ साइक्लिङ सुरु भएको छ।
कालीगण्डकीमाथिको भिरस्थित रिसोर्ट परिसरमा (बाग्लुङ बलेवातर्फ) स्काइ साइक्लिङ निर्माण गरिएको हो। साइक्लिङ दुईतर्फी गरी ६ सय मिटर रहेको द क्लिफले बताएको छ।
प्रतिव्यक्ति ३ हजार ५ सय रहेको साइक्लिङ खेल्न हाल सुभारम्भ छुटअन्तर्गत २ हजार ५ सयमै टिकट पाइने कम्पनीका अध्यक्ष राजु कार्कीले बताए। बन्जी वा स्विङ गर्नेलाई अतिरिक्त बीस प्रतिशत छुट दिइने उनले जानकारी दिए।
गुलेली पिङ, पारिवारिक पिङ, हाइ रोप स्टेसन, स्काइ चियर, घोडाचडी सञ्चालनमा ल्याएको द क्लिफले नयाँ प्रडक्टका रुपमा स्काइ साइक्लिङ सुरु गरेको कार्की बताउँछन्।
‘विश्वमा २ सय अठ्ठाइस मिटर उचाइमा र ६ सय मिटरको कुनै पनि व्यवसायिक स्काइ साइक्लिङ नरहेकोले यो नै विश्वको लामो र अग्लो व्यवसायिक जिपलाइन हो’ अध्यक्ष कार्कीले दावीसाथ भने।
विश्वकै अग्लो स्विङसमेत सञ्चालन गर्दै आइरहेको द क्लिफको गुलेली पिङ र हाइ रोप स्टेसन युवाहरूमाझ निकै लोकप्रिय छ। उक्त क्षेत्रलाई एड्भेन्चर हबका रूपमा विकास गर्ने योजना रहेको र भविष्यमा अन्य गतिविधिसमेत थप गरिने उनले बताए।
भर्खरै
लोकप्रिय
