कालिजलाई ताकेको बन्दुकको छर्रा लाग्दा युवकको मृत्यु, ६ जना पक्राउ

पोखरा – स्याङ्जामा गोली लागेर एक युवकको मृत्यु भएको छ। कालिखर्क जंगलमा पुस २० काे राति कालिजको शिकार गर्ने क्रममा गोली लागेर आँधिखोला गाउँपालिका- १ कालिखर्कका २७ वर्षीय मनोज विकको मृत्यु भएको हो।

भरुवा बन्दुकको छर्रा लागेर विकको घटनास्थलमै मृत्यु भएको जिल्ला प्रहरी कार्यालय स्याङ्जाले जनाएको छ। घटनापछि फरार भएका ६ जनालाई आइतबार पक्राउ गरिएको छ।

आँधिखोलाका भीमबहादुर सुनार, सोही ठाउँकै सुनिल विक, रेवत पौडेल र धनबहादुर विक समातिएका छन्। सोही ठाउँका गोविन्द अधिकारी र साजन कामीलाई बुटवल बसपार्कबाट पक्राउ गरिएको स्याङ्जाका डीएसपी राजेन्द्र अधिकारीले जानकारी दिए।

उनीहरुलाई कर्तव्य ज्यान मुद्दामा म्याद थपेर अनुसन्धान अघि बढाइएको अधिकारीले बताए। -न्युज कारखाना