दबाब थरी थरी

जता ततै देखाउँछन् अभाव थरी थरी
कोही भने चपाउँछन् कवाब थरी थरी।।

निल्न चाहिँ गाह्रो ओकल्न झन सकस
माखेसाङ्लोको देखियो प्रभाव थरी थरी।।

ठाउँमा जान लौलौ भने पुगे पछि पुग्यो
काँधमा चढी कुर्लिनेका रवाफ थरी थरी।।

बाहिर देख्दा रङ्गिचङ्गि भित्रि रुप अर्कै
खुट्टयाउन गाह्रो पर्‍यो नकाव थरी थरी।।

पाउनेले भन्छ हुन्छ अर्काको नारा जुलुस
भित्रि चुरो उस्तै उस्तै स्वभाव थरी थरी।।

ज्योतिसले राम्रै भन्थे चिना पात्रो झिकी
कुन ग्रहको फेरि अहिले दबाब थरी थरी।।