चुनावी तालमेल विवादले समस्यामा देखिएको सत्ता गठबन्धनको बैठक बस्दै

काठमाडौँ- चुनावी तालमेललाई लिएर विवाद चलिरहेका बेला सत्ता गठबन्धनको बैठक सोमबार बस्दैछ ।

वैशाख ३० गतेका लागि तय भएको स्थानीय तहको निर्वाचन हुन नसक्ने वा सर्ने आशंका-अड्कलबाजी चलिरहेका बेला गठबन्धनमा तोलमेललाई लिएर विवाद उत्कर्षमा छ ।

महानगर र उपमहानगरसहितका महत्त्वपूर्ण स्थानमा उम्मेदवारको भागबण्डामा सत्ता गठबन्धनभित्र समस्या छ ।

उम्मेदवारको भागबण्डा तथा चुनावी तालमेलका सम्बन्धमा पाँच दलीय गठबन्धन भित्रका दलमा आन्तरिक रूपमा असन्तुष्टि उच्च बनेको छ ।

दलले आफ्ना तल्ला निकायलाई आ-आफ्नै तयारीमा लाग्न निर्देशन समेत दिन थालेका छन् । सत्ता गठबन्धनको चुनावी तालमेल जोखिममा परेका बेला बैठक बस्न लागेको हो ।

बिहान ९ बजे बस्ने बैठकमा सम्भावित तालमेल र भागबण्डाबारे छलफल हुने जनाइएको छ ।