काठमाडौं। काठमाडौं माहानगरका स्वतन्त्रतर्काफबाट मेयर पदका उम्मेदवार बालेन शाहको हारजितमा बाजी राखेको बिषयमा पक्राउ परेका दुई युवक तारिखमा छुटेका छन्।
खोटाङको दिक्तेल रुपाकोट मझुवागढी नगरपालिका-५ लफ्याङका विजय फुयाल र रमेश खड्कालाई खोटाङ प्रहरीले सोमबार पक्राउ गरेको थियो। उनीहरुलाई प्रहरीले मंगलबार तारेखमा छाडेको जिल्ला प्रहरी कार्यालय खोटाङका डिएसपी उमेश लम्सालले बताएका छन्।
उनका अनुसार उनीहरुले बालेन शाहको जित हारको पक्ष बिपक्ष लिदै २८ केजी बराबरको खसी सट्टेबाजी गरेका थिए। ती दुई युवाहरुले अन्य तीन जनालाई समेत रोहबर राखेर लिखित बाजी गरेका हुन्।
यसरी शाहको हार जितको पक्ष विपक्षमा गरीएको सो कागज सामाजिक सञ्जालमा भाइरल समेत बनेको छ।
उक्त कागजमा विजय फुयाल र रमेश खड्काले बालेनको जित हुने वा हार हुने पक्षमा २८ किलोको खसी वा सो बराबरको रकमको बाजी राखेको स्पष्ट उल्लेख गरीएको छ।
कागज अनुसार विजय ‘बालेनले जित्छ’ भन्ने पक्षमा छन् भने रमेश ‘हार्छ’ भन्ने पक्षमा छन् ।
बालेनले जितेमा रमेशले विजयलाई २८ किलोको खसी दिने र बालेनले हारेमा विजयले रमेशलाई २८ केजीको खसीको मासु बराबरको रकम दिने कागजमा उल्लेख छ ।
सट्टाबाजीको कागज सामाजिक सञ्जालमा भाइरल भएपछि खोटाङ प्रहरीले उनीहरुलाई नियन्त्रणमा लिएको थियो।
नियन्त्रणमा लिइएको उनीहरुलाई अनुसन्धान गर्दा कसैलाई हानी नोक्सानी गर्ने किसिमले सट्टेबाजी नगरीएको पाइएपछि तारिखमा छोडिएको डिएसपि लम्सालले बताएका छन्।
‘गाँघरमा भएकोले हामीले पहिलो चोटि सम्झाइ बुझाइ उनीहरुलाई छाडेका छौं।’ उनी भन्छन्, ‘एउटा सामान्य खसीको विषय थियो त्यसैले पनि हामीले एकचोटिलाई सम्झाइ बुझाए छोडेका हौं।’
भर्खरै
लोकप्रिय
