काठमाडौँ- पशुपतिनाथ मन्दिरको परिसरमा सञ्चालन भइरहेको ‘अतिरुद्र महायज्ञ’ मा एक महिलाले सिद्धबाबा भनिने कृष्ण गिरीलाई अपशब्द प्रयोग गरेकी छन्।
अनुयायीलाई बलात्कार गरेको अभियोग लागेका सिद्धबाबा भनिने कृष्ण गिरीलाई अपशब्द प्रयोग गरेको भन्दै एकजना महिलालाई प्रहरीले नियन्त्रणमा लिएको छ।
मंगलबार महायज्ञ चलिरहेको ठाउँमा रोशनी शाहीले गिरीलाई अपशब्द प्रयोग गरेसँगै प्रहरीले उनलाई यज्ञबाट बाहिर निकालेको थियो।
उनलाई प्रहरीले सोधपुछका लागि गौशाला वृत्त लगिएको प्रहरी वृत्त, गौशालाका डीएसपी केशव भट्टराईले बताएका छन्। यद्यपि सोधपुछपछि प्रहरीले उनलाई छोडिसकेको छ। शाहीलाई उनका श्रीमान् आएर लिएर गइसकेको भट्टराईले बताएका छन्।
गिरीले पशुपतिनाथ मन्दिरको परिसरमा ‘अतिरुद्र महायज्ञ’ सञ्चालन गरिरहेका छन् । जिल्ला अदालत, सुनसरीमा उनीविरुद्धको बलात्कार मुद्दा विचाराधीन छ ।
प्रत्यक्षदर्शीका अनुसार शाहीले गिरीलाई ‘बलात्कारी’ भनेकी थिइन् । शाहीले बलात्कारीको आरोप लगाएसँगै होहल्ला सुरु भएको थियो। प्रहरीले होहल्ला नियन्त्रण गर्न शाहीलाई नियन्त्रणमा लिएको दाबी गरेको छ।
आफ्नै अनुयायी महिलामाथि बलात्कार गरेको अभियोगमा जिल्ला प्रहरी कार्यालय, सुनसरीमा जाहेरी दर्ता भएपछि सिद्धबाबा भनिने कृष्ण गिरीमाथि लागेको मुद्दाको अझै किनारा लागिसकेको छैन।
भर्खरै
लोकप्रिय
