मनसुन सक्रिय हुन थाल्यो, पश्चिममा पनि प्रभाव देखियो

काठमाडौँ – मनसुन देशभर सक्रिय हुने क्रममा रहेको जल तथा मौसम पूर्वानुमान महाशाखाले जनाएको छ । मंगलबार रातिदेखि मनसुनी गतिविधि केही सक्रिय भएको मौसमविद वरुण पौडेलले जानकारी दिए ।

देशभर अहिले पूर्वी वायुको प्रभाव रहेको र अब क्रमिक रुपमा मनसुन सक्रिय हुने देखिएको उनले बताए । देशका पश्चिम क्षेत्रमा पनि मनसुनी प्रभाव देखिन थालेको छ ।

विशेष गरी बर्दिया, धनगढी, दिपायलसहितका सुदूरपश्चिमका तराईका क्षेत्रमा बुधबार बिहानैदेखि पानी परिरहेको छ । बुधबार दिनभर देशका सबै क्षेत्रको मौसम सामान्यतया बदली हुने र हल्कादेखि मध्यम स्तरको पानी पर्ने सम्भावना रहेको मौसमविद पौडेलले बताए ।

काठमाडौँ उपत्यकामा बिहानै पानी परे पनि अहिले घाम लागेको छ । तर फेरि बादल लागेर पानी पर्ने सम्भावना छ । दिनभर नै मौसम खुल्ने र बदली हुने क्रम चलिरहने मौसमविदको भनाई छ ।