स्थानीयले ट्रकबाटै खोसे रासायनिक मल

धादिङ – धादिङको धार्केमा रासायनिक मल बोकेर काठमाडौँतर्फ आउँदै गरेका दुईवटा ट्रकबाट किसानले मल खोसेका छन्।

मल बोकेको ट्रकलाई राजमार्ग छेउमा रोकेर किसानले मल झिकेर लगेका हुन्। सो मल भारतबाट भन्सार छली ल्याएको बुझिएको छ।

अवैध रासायनिक मल लिएर आएको ट्रकलाई राजस्व अनुसन्धान विभागले शुक्रबार राति धादिङको चरौँदीबाट नियन्त्रणमा लिएको थियो। त्यसपछि सशस्त्र प्रहरीको बलको सुरक्षामा काठमाडौँतर्फ ल्याइँदै गरेका बेला किसानहरूले ट्रक रोकेर मल खोसेका हुन्।

शनिबार दिउँसो मल बोकेको ट्रक काठमाडौँतर्फ जाँदै गरेको सूचना पाएपछि धार्केमा राजमार्गमा ४/५ सय किसान भेला भएका थिए। मल बोकेको ट्रक आइपुग्ने वित्तिकै किसानले ट्रक रोकेर मल झिकेर लगेका हुन्।

अहिले ट्रक प्रहरीको नियन्त्रणमा रहेको र घटनाबारे अनुसन्धान भइरहेको बताइएको छ।