बुटवल- इलाका प्रहरी कार्यालय, बुटवलका प्रहरी नायव उपरीक्षक ठगबहादुर केसी बरामद गरेको सुन र नगद आफैँले राखेको आरोपमा अनुसन्धानमा तानिएका छन्।
प्रहरी प्रधान कार्यालयको निर्देशनमा काठमाडौंबाट आएको अनुसन्धान टोलीले आइतबार साँझ केसीलाई निवासबाटै नियन्त्रणमा लिएर अनुसन्धान थालेको हो।
सुन कारोबारसम्बन्धी मुद्दामा रकम असुली गरेको विषयमा अनुसन्धान गर्न भन्दै आएको प्रहरी टोलीले केसीको निवासमा खानतलासी गर्दा लाखौँ नगद फेला परेको प्रहरी स्रोतको भनाइ छ।
गत मंसिरमा बुटवलका एक व्यापारीले ल्याएको अवैध सुन नियन्त्रणमा लिएर आफैँले राखेको सूचना पाएपछि प्रहरी प्रधान कार्यालयले छानबिन थालेको थियो।
केसीको निवासबाट ३५ तोला सुन र २५ लाख रुपैयाँ नगदसमेत बरामद भएको प्रहरी स्रोतको भनाइ छ।
केसीले सुन नियन्त्रणमा लिई व्यापारीसँग २५ लाख रुपैयाँ मागेको आरोप छ।
व्यापारीले २५ लाख रुपैयाँ बुझाएपनि सुन फिर्ता लिन नपाउँदै केसीलाई प्रहरीको छानबिन टोलीले नियन्त्रणमा लिएको हो। केसी सोमबार रमाना लिएर कास्की जाने तयारीमा थिए।
भर्खरै
लोकप्रिय
