इन्डोनेसियाको जकार्तामा भएको पब्जी मोबाईल ग्लोबल च्याम्पियनसिपमा नेपाली टिम द रियल सोल्जर्स (डीआरएस) ले दोस्रो स्थान हासिल गरेको छ।
पब्जिको विश्वकपका रुपमा समेत लिइने यो प्रतियोगितामा उपविजेता बनेसँगै डीआरएसले पुरस्कारस्वरूप कुल २ लाख डलर हात पारेको थियो। फाइनल चरणको छनोट हुँदाको ९२ हजार अमेरिकी डलरपनि उसले पुरस्कार स्वरुप प्राप्त गर्दै समग्रमा ३ करोड ८६ लाख नेपाली रुपैयाँ पुरस्कार हात पारेको हो।
१६ टिम सहभागि प्रतियोगितामा १४ टिमले लिग स्टेजबाट छनोटमा स्थान बनाउँदा २ टिमले सोझै स्थान बनाएका थिए। प्रतियोगितामा टर्कीको एस टु जी स्पोर्ट्स विजयी भएको थियो। उसले ४ लाख अमेरिकी डलर हात पार्दा समग्रमा भने ५ लाख १० हजार डलर जित्न सफल भयो।
प्रतियोगिताको अन्तिम चरणको खेल बाँकी हुँदासम्म उपाधि होडमा रहेको डीआरएस एरांगलमा खेलिएको अन्तिम खेलमा अपेक्षित प्रदर्शन गर्न असफल भएको थियो।
टर्कीको एसटुजी ई स्पोर्ट्सले १ सय ९० अंकका साथ पहिलो स्थान हासिल गर्यो। डीआरएस १ सय ५८ अंकसहित दोस्रो भएको हो। समान १ सय ५६ अंक जोडेका तेस्रो स्थानको अल्फा ७ ईस्पोर्ट्सले २ लाख १७ हजार तथा चौथो स्थानको गडलाइक स्टलवार्टले २ लाख अमेरिकी डलर जित्यो।
नेपालबाटै सहभागि भएको टिम ट्रेन्ड टु किल (टि२के) १ सय १२ अंकसाथ १३ औं स्थानमा रहयो। टोलीले कुल १ लाख ३२ हजार ५ सय (१ करोड ७५ लाख) अमेरिकी डलर प्राप्त गर्यो। छनोट चरणमा उत्कृष्ट प्रदर्शन गरेको टि२के ले अन्तिम चरणमा भने कमजोर प्रदर्शन गरेको थियो।
भर्खरै
लोकप्रिय
