नेप्सेका सिइओले हाजिर गर्न पाएनन्

काठमाडौँ – नेप्सेका प्रमुख कार्यकारी अधिकृत चन्द्रसिंह साउँदले आफूलाई बुधबार हाजिर गर्न नदिइएको बताएका छन् ।

अध्यक्ष लक्ष्मण न्यौपानेले हाजिर गर्न नआउन भनेकाले आफू कार्यालय नगएको साउँदले बताएका छन् । साउदले देश सञ्चारसँग भने, ‘नेप्सेका अध्यक्षले आज नआउन मौखिक रुपमा भने, लिखित केही पनि आएको छैन । त्यसैले गइनँ ।’

यस्तै अध्यक्ष न्यौपानेले भने आफूलाई अर्थ मन्त्रालयबाट दबाब आएकाले साउदलाई कार्यालयमा नआउन भनेको बताएका छन् । उनले भने, ‘अर्थ मन्त्रालयबाट साउदलाई हाँजिरका लागि नआउन भन्ने भनियो, त्यसैले मैले उहाँलाई जानकारी गराएको हुँ ।’

गएको असार २० गते सरकारले गरेको निर्णयपछि बर्खास्त भएका साउँद गएको आइतबार सर्वोच्चले त्यो निर्णय कार्यान्वय नगर्न भनेपछि कार्यालय गएका थिए। उनले मंगलबार हाजिर गरेका थिए ।