काठमाडौँ- छातीमा संक्रमण भएपछि उपचारका लागि भारत लैजाने तयारी गरिएका राष्ट्रपति रामचन्द्र पौडेलको उपचार नेपालमै सम्भव रहेको चिकित्सकहरुले बताएका छन्।
मंगलबार बिहान अचानक राष्ट्रपति कार्यालयमै बेहोश भएपछि राष्ट्रपति रामचन्द्र पौडेललाई उपचारका लागि महाराजगञ्जस्थित त्रिवि शिक्षण अस्पताल भर्ना गरिएको थियो। बुधबार बिहान उनलाई थप उपचारका लागि श्री एयरको एयर एम्बुलेन्समार्फत नयाँ दिल्लीस्थित अल इन्डिया इन्स्टिच्यूट अफ मेडिकल साइन्सेस (एम्स) लगिँदै छ।
डाइबेटिज, ग्यास्ट्रोसम्बन्धी समस्या र बृद्ध उमेरका कारण पौडेलको स्वास्थ्य गम्भीर बनेको उनको उपचारमा संलग्न चिकित्सकहरुले बताएका छन्। यद्यपि उनको उपचार नेपालमै सम्भव रहेको र यसका लागि भारत गइरहनु आवश्यक नरहेको त्रिवि शिक्षण अस्पतालका वरिष्ठ चिकित्सकहरु बताउँछन्।
राष्ट्रपतिको शपथ गर्नेबित्तिकै पनि पौडेललाई त्रिवि शिक्षण अस्पतालमा भर्ना गरेरै उपचार गरिएको थियो।
पछिल्लो समय छातीमा पिप जमेका कारण उनलाई असजिलो भएको र मंगलबार बिहान करिब आधा घन्टा उनी बेहोश अवस्थामै रहेको चिकित्सकहरुले जानकारी दिएका छन्।
चिकित्सकहरुले नेपालमै उपचार सम्भव रहेको जानकारी गराए पनि सचिवालय र परिवारको जोडबलमा उनलाई भारत लगिँदै गरिएको स्रोतले जानकारी दिएको छ।
भर्खरै
लोकप्रिय
