सिमकोट – खार्पुनाथ गाउँपालिकाको स्वास्थ्य शाखाले गर्भवती महिलाहरुको रक्त परीक्षण र भिडियो एक्स-रे गर्ने सेवा सुरु गरेको छ।
आमा सुरक्षा कार्यक्रमलाई प्रभावकारी बनाउन शाखाले यो कार्यक्रम अनिवार्य रुपमा सञ्चालनमा ल्याएको हो।
स्वास्थ्य शाखाका प्रमुख बलिराज शाही गाउँपालिकाका पाँच वटै वडाका स्वास्थ्य चौकीहरूले गर्भवती महिलाहरुको रक्त परीक्षण र भिडियो एक्स-रे गर्ने कार्य सुरु गरेको बताए।
रक्त परीक्षणको अन्तर्गत आठ प्रकारको परीक्षण हुनेछ भने अर्को पिसाप परीक्षणसमेत गरिनेछ। यसअघि भिडियो एक्स-रे जिल्ला अस्पतालबाट दक्ष जनशक्ति झिकाएर वर्षमा एक पटक गर्ने गरिएको भएपनि यस आर्थिक वर्षबाट भने अनिवार्य रुपमा सबै गर्भवती महिलाहरुको लागि रक्त परीक्षण र भिडियो एक्स-रे सुरु गरिएको छ।
यो कार्यले आमा तथा गर्भमा रहेको शीशुको ज्यान जोगाउन सहज हुने, समयमै रोग पत्ता लाग्ने, जटिल रोग भए समयमै थप उपचारका लागि रिफर गर्न सहज हुनका साथ संस्थागत सुत्केरीको दर पनि बृद्धि हुने छ।
त्यसैगरी गर्भवती महिलाको रक्त परीक्षण गर्दा शरीरमा रगतको मात्रा कम भए त्यसलाई बृद्धि र ब्यवस्थापनका लागि समयमै उपचार गर्न सहज हुने विश्वास गरिएको छ। यस आर्थिक वर्षमा सबै गर्भवती महिलाहरुलाई अनिवार्य रुपमा छ पटक भिडियो एक्स-रे र एक पटक रक्त परीक्षण वस्ती स्तरमा स्वास्थ्यकर्मी पुगेर नि:शुल्क गरिनेछ।
शाखाले यो कार्य गर्नका लागि प्रत्येक दुई महिनामा बस्ती स्तर स्वास्थ्यकर्मी पुगेर सेवा प्रदान गर्न मितिसमेत तय गरेको छ। जिल्लाका सात वटा मध्य गर्भवती महिलाहरूको रक्त परीक्षण र छ पटक भिडियो एक्स-रे गर्नका लागि कार्यतालिका तय गर्ने पहिलो गाउँपालिका रहेको छ।
यस आर्थिक वर्षमा खार्पुनाथ गाउँपालिका भरिमा १६० जना गर्भवती महिला पुग्ने अनुमान गरिएको छ। गतवर्ष गाउँपालिकामा ११७ जना गर्भवतीको संस्थागत सुत्केरी भएकी थिइन्।
भर्खरै
लोकप्रिय
