दाङ–दाङको बंगलाचुली गाउँपालिकामा मृत भेटिएका घोराही उपमहानगरपालिका ६ बरुवागाउँ निवासी १९ वर्षीय वसन्त वलीको हत्या भएको पुष्टि प्रहरीले गरेको छ।जिल्ला प्रहरी कार्यालय दाङका प्रमुख एसपी दुर्गा सिंहले वलीको हत्या भएको र घटनामा संलग्न भएको अभियोगमा वलीका मामा बंगलाचुली गाउँपालिका निवासी २४ वर्षीय भोजराज महरालाई नियन्त्रणमा लिएको जानकारी दिइन्।
वलीको शव गत बिहीबार बंगलाचुली गाउँपालिका ४ श्रीबारीमा फेला परेको थियो। चारदिन अघि घोराहीको बरुवा गाउँस्थित घरबाट भाञ्जा वली र मामा महरा सँगै निस्किएका थिए। भाञ्जा मृत अवस्थामा फेला पर्दा मामा महरा भने सम्पर्कविहीन थिए। प्रहरीले उनका मामा महरालाई भारतबाट पक्राउ गरेर ल्याएको एसपी सिंहले जानकारी दिइन्। केही युवालाई नियन्त्रणमा लिएर अनुसन्धान गरेपछि वलीको हत्या भएको पुष्टि भएको हो।
वलीको शरीरको माथिल्लो भागको कपडा फुकालेको अवस्थामा शव फेला परेको थियो भने शरीरभर निलडाम र घाउखत रहेको प्रहरीले जानकारी दिएको छ। हत्याको अभियोगमा पक्राउ परेका महरालाई अदालतबाट म्याद थप गरी अनुसन्धान थालिएको जिल्ला प्रहरी कार्यालयका अनुसन्धान अधिकृत, प्रहरी निरीक्षक गोपिकृष्ण सुबेदीले जानकारी दिए। के कारणले मामाले भाञ्जाको हत्या गरेका हुन् भन्ने विषयमा प्रहरीले केही बताएको छैन। घटनाको अनुसन्धान भइरहेको छ।
यो पनि हेर्नुहोस्:
गौचन हत्याका मुख्य योजनाकार पक्राउ
भर्खरै
लोकप्रिय
