पोखरा- गएराति पोखराको पर्स्याङमा कारले ठक्कर दिँदा २ जना पैदलयात्रीको मृत्यु भएको छ।
बाग्लुङ बसपार्कबाट जिरोकिलोमिटरतर्फ जाँदै गरेको बा १३ च ३७२१ नम्बरको कारले राति ११ बजेर ५१ मिनेटमा पैदलयात्रीलाई ठक्कर दिएको हो।
ठक्करबाट बाग्लुङको ढोरपाटन घर भइ नदीपुर बस्ने २० वर्षीय ढालेन्द्र छन्त्याल र नामथर नखुलेका अन्दाजी ३५ वर्षीय पुरुष घाइते भएका थिए।
दुवैको उद्दार गरेर पोखरा स्वास्थ्य विज्ञान प्रतिष्ठान पश्चिमाञ्चल क्षेत्रीय अस्पताल लगिएको थियो। दुवै जनाको उपचारको क्रममा गएराति नै मृत्यु भएको जिल्ला प्रहरी कार्यालय, कास्कीका सूचना अधिकारी डिएसपी श्रवणकुमार विकले बताए।
पैदलयात्रीलाई ठक्कर दिएर भाग्ने कारलाई वडा प्रहरी कार्यालय बैदामबाट खटिएको १५ जनाको टोलीले नियन्त्रणमा लिएको छ। कार चालक भने फरार रहेको प्रहरीले जानकारी दिएको छ।
दुवै जनाको शव अस्पतालको शवगृहमा राखिएको डिएसपी विकले जानकारी दिए।
भर्खरै
लोकप्रिय
