भारत भ्रमणमा रहेको इंग्ल्यान्डले पाँच खेलको टेस्ट सिरिज ३-१ ले गुमाएको छ। घरेलु टोलीले चौथो टेस्टमा इंग्ल्यान्डलाई ५ विकेटले पराजित गर्दै एक खेल अगावै सिरिज आफ्नो नाममा बनायो।
राँची टेस्टमा सोमबार १ सय ९२ रनको लक्ष्य पाएको भारतले ५ विकेट गुमाएर अन्तिम दिन बाँकी हुँदै सिरिज जित्न सफल भयो। भारतका लागि कप्तान रोहित शर्माले सर्वाधिक ५५ रन बनाउँदा शुभमन गिल ५२ रनमा अविजित रहे। त्यस्तै ध्रुव जुरेलले अविजित ३९ रनको इनिङ्स खेले। गिल र जुरेलबीच छैटौं विकेटका लागि अविजित ७२ रनको साझेदारी भएसँगै भारत विजयी भयो।
इंग्ल्याण्डका लागि शोएब बसिरले सर्वाधिक ३ विकेट लिए। टम हार्टले र जो रुटले समान १-१ विकेट लिए। भारतले चौंथो दिन बिना विकेटको क्षतिमा ४० रनबाट दिनको खेल सुरु गरेको थियो। यसअघि तेस्रो दिननै इंग्ल्यान्ड दोस्रो इनिङ्समा १ सय ४५ रनमै अलआउट हुँदा भारतले सहज लक्ष्य पायो। पहिलो इनिङ्समा इंग्ल्याण्ड ४६ रनको अग्रता बनाउन सफल भएपनि दोस्रो इनिङमा समालिन नसक्दा भारतले १ सय ९२ रनको लक्ष्य पाएको थियो।
पहिलो इनिङ्समा इंग्लिस टोली ३ सय ५३ रनमा अलआउट भएको थियो भने भारतीय टोली ३ सय ७ रनमा अलआउट भएको थियो। त्यसअघि पहिलो टेस्ट इंग्ल्यान्डले २८ रनले जित हासिल गर्दा दोस्रो टेस्टमा भारत १ सय ६ रनले विजयी भयो। त्यस्तै तेस्रो टेस्टमा ४ सय ३४ रनको फराकिलो जित हासिल गरेको भारतले लगातार तेस्रो जित हासिल गर्ने क्रममा चौंथो टेस्ट पाँच विकेटले आफ्नो पक्षमा पार्यो। अब यि दुई बिचको पाँचौं तथा अन्तिम टेस्ट धर्मसालामा आगामी ७ मार्चमा सुरु हुने छ।
भर्खरै
लोकप्रिय
