काठमाडौँ – लोकतान्त्रिक समाजवादी पार्टी, नेपालका अध्यक्ष महन्थ ठाकुरले मधेसमाथिको अन्याय मुलुकमा अझै जारी रहेको आरोप लगाएका छन्।
महोत्तरीको मटिहानीमा आयोजित एक कार्यक्रममा अध्यक्ष ठाकुरले सरकारले मधेसमाथि विभेद जारी राखेको जिकिर गर्दै अदालतले पनि न्याय नगरेको गुनासो गरे।
उनले सबैभन्दा बढी जनसंख्या रहेको मधेस प्रदेशमा कम बजेट दिनु, निर्वाचन क्षेत्र कम बनाउनु मधेस माथिको विभेदको उदाहरण रहेको बताए।
मधेस देशको लगभग ५१ प्रतिशत जनसंख्या ओगटेको बताउनु भयो। अध्यक्ष ठाकुरले समग्र मधेसवासीको प्रतिनिधित्व मधेस प्रदेशले मात्रै गर्न नसक्ने भएकाले उनीहरुको हितका लागि अझै पनि संघर्षको आवश्यकता रहेको बताए।
लोसपा अध्यक्ष ठाकुरले नेपालको इतिहास नै हत्या हिंसाले भरिएको स्मरण गराउँदै आफूहरुले शान्तिपूर्ण संघर्ष गर्दा पनि गोली लठ्ठी खानुपरेको पीडा सुनाए।
उनले भने, ‘आधाभन्दा बढी जनसंख्या भए पनि १ सय ६५ मध्ये शुरुमा ६५ सिट मात्रै दिइएको थियो तर हाम्रै आन्दोलनका कारण अहिले त्यो संख्या ७९ पुगेको छ, जबकि हाम्रो माग ८२ सिट रहेको छ।’
अन्तरिम संविधानमा रहेका अधिकार पनि वर्तमान संविधानबाट हटाइएपछि पटक पटक संघर्ष गर्नुपरेको र सोही संघर्षका कारण कैयौँले सहादत प्राप्त गरेको बताए। संविधान संशोधन तथा आन्दोलनकारीको न्यायका लागि अझै संघर्ष गर्न आवश्यक रहेको उनको भनाइ थियो।
भर्खरै
लोकप्रिय
