धनगढी – १३ वर्षीया बालिकाको बलात्कारपछि हत्याको विरोधमा प्रहरीको गोली लागेर मृत्यु भएका कञ्चनपुरको भिमदत्त नगरपालिका, १८ का सन्नी खुनालाई सहिद घोषणाको माग गरिएको छ ।
मृतक बालकको परिवारले सहिद घोषणा र क्षतिपूर्ति पाउनुपर्ने माग गरिरहेका बेला जिल्लामा बसेको सर्वदलीय सर्वपक्षीय बैठकले पनि मृतक बालक खुनालाई सहिद घोषणाका लागि राज्यसँग आग्रह गर्ने निर्णय गरेको छ ।
शनिबार बसेको बैठकले खुनालाई सहिद घोषणा गराउन पहल गर्नुका साथै मृतकका परिवारलाई क्षतिपूर्ति र घाइतेको निशुल्क उपचारका लागि स्थानीय, प्रदेश र केन्द्र सरकारलाई आग्रह गर्ने निर्णय गरेको कञ्चनपुरका प्रमुख जिल्ला अधिकारी तारानाथ अधिकारीले जानकारी दिए ।
उनले आन्दोलनका कार्यक्रमहरु स्थगित गरेर घटनाको सम्पूर्ण पृष्ठभूमिको अनुसन्धान र छानबिनका लागि सहयोग पुगाउन सम्बन्धित सबैमा अपील गर्ने निर्णय गरिएको पनि बताए ।
आन्दोलनका क्रममा भएका तोडफोड र प्रहरीले चलाएको गोलीका विषयमा समेत छानबिन गर्नका लागि गृह मन्त्रालयलाई आग्रह गरिने उनले बताए ।
बैठकमा अवस्था सामान्य बन्दै गएमा कर्फ्यु हटाउन सकिने विषयमा पनि छलफल भएको छ । अहिले कञ्चनपुरमा कर्फ्यु जारी छ ।
बैठकमा राजनीतिक दल, नागरिक समाज, महिला अधिकारकर्मी लगायतको सहभागिता थियो ।
भर्खरै
लोकप्रिय
