काठमाडौं- टी-२० विश्वकप क्रिकेट अन्तर्गत आफ्नो अन्तिम खेलमा नेपालले जितका लागि १ सय ७ रनको लक्ष्य पाएको छ। टस जितेर पहिले बलिङ गरेको नेपालले बंगलादेशका कुनैपनि ब्याटरलाई खुलेर खेल्न दिएन।
नेपाली बलरसामु निरीह देखिएको बंगलादेशको ब्याटिङ इनिङ ४ बल अगाडिनै अलआउट हुँदै १ सय ६ रनमा समेटियो। बंगलादेशका लागि सकिब अल हसनले १७ रन बनाउनु सर्वाधिक रह्यो। उनी बाहेक महमदुल्लाह र ऋसद होसेइनले समान १३-१३ रन बनाए। थप दोहोरो स्कोरका रुपमा लिटन दासले १० र तस्किन अहमेदको १२ रन रह्यो।
बंगलादेशलाई सस्तैमा पेभिलियन फर्काउने क्रममा सन्दीप लामिछाने, रोहित पौडेल, सोमपाल कामी र दिपेन्द्र सिंह ऐरीले समान २-२ विकेट लिएका थिए। सन्दीपले बंगलादेश विरुद्ध २ विकेट लिएसँगै टी-२० अन्तर्राष्ट्रियमा १ सय विकेट पुरा गरेका छन्। अब नेपाल केही समय पछि जवाफि इनिङ सुरु गर्ने छ।
दक्षिण अफ्रिकासँग १ रनले पराजित भएपछि अघिल्लो चरणको सम्भावना सकिएको नेपालका लागि यो खेल एउटा टेस्ट टोलीलाई हराउने मौका रहेको छ। यद्यपि बंगलादेशका लागि भने यो खेल जित्दै अघिल्लोचरण पुग्ने अवसरका रुपमा रहने छ।
भर्खरै
लोकप्रिय
