सौर्य एयरलाइन्सको जहाज दुर्घटनामा मृत्यु हुने मध्ये तीन जना विराटनगरबाट रहेका छन् ।
विराटनगरस्थित एयरलाइन्सका स्टेशन म्यानेजर प्रकाश पौडेलका अनुसार सुरक्षा प्रमुख सागरराज आचार्य, मृतक सह–चालक सुशान्त कट्वाल, र एरोनेटिकल इन्जिनियर अश्विन निरौलाको दुर्घटनामा मृत्यु भएको हो ।
सुरक्षा प्रमुख आचार्य विराटनगर–८ निवासी भएको बताएका पौडेलका अनुसार उनी विगत ४ वर्षदेखि विमान सुरक्षा प्रमुखका रुपमा कार्यरत रहेका थिए ।
त्यसैगरि, विगत ३ वर्षबाट सह–चालकका रुपमा रहेका सुशान्त कट्वाल विराटनगर आयल निगममा रहेको उनले बताए ।
एरोनोटिकल इन्जिनियर आश्विन निरौला।
पूर्व जिल्ला शिक्षा अधिकारी ओम कट्वालका एक छोरा सुशान्तले दक्षिण अफ्रिकाबाट विमान चालक अध्ययन गरेका हुन् । हाल कट्वाल परिवार भक्तपुरस्थित भातगाँउ क्षेत्रमा बसोबास गर्दै आएका छन् । सुशान्त अध्ययन पुरा गरि विगत ३ वर्षदेखि सौर्यमा थिए । त्यसैगरि, विराटनगर–२ निवासी तीर्थ निरौला र कल्पना निरौलाका एक छोरा अश्विन निरौला विमानका एरोनोटिकल इन्जिनियर हुन् । तीन वर्षअघि विवाह बन्धनमा बाधिँएका निरौला एयरलाइन्सका अध्यक्ष दिपक पोखरेलका भान्जा हुन्। उनी सौर्य एयरमा सुरुबाट नै कार्यरत रहेको स्टेशन म्यानेजर पौडेलको भनाइ छ ।
विमान दुर्घटनाग्रस्त हुँदा चालक मनिषरत्न शाक्य घाइते भएका छन्। दुई चालक दलसहित १९ जना सवार विमान दुर्घटनामा १८ जनाको घटनास्थलमा मृत्यु भएको थियो ।
सौर्यको दुई वटा जहाज मध्ये दुर्घटनाग्रस्त जहाजको सि–चेक(जाँच)का लागि पोखरास्थित नागरिक उड्डयनको ह्याङ्गर लगिदै थियो ।
आफ्नै ह्याङ्गर नभएपछि पोखरास्थित नागरिक उडड्यनको ह्याङगर भाडामा लिएर एयरलाइन्सले सि–चेक गर्दै आएको थियो । सि–चेक प्रत्येक १८ देखि २४ महिनाको अन्तरालमा विमानको सबै पार्टपुर्जादेखि मेशिनरी सामाग्रीको जाँच गरिने प्रक्रिया हो । सोही परिक्षणका क्रममा एयरलाइन्सका प्राविधीक टोलीसहित विमान पोखरातर्फ जाने क्रममा दुर्घटनामा परेको हो ।
भर्खरै
लोकप्रिय
