विराटनगरबाट काठमाडौका लागि उडेको विमान नाबालक यात्रु विरामी भएपछि पुनः विराटनगर फर्काईएको छ।
बुधबार बुद्ध एयरको जहाजमा सवार सिकिस्त नाबालकको स्वास्थ्यमा थप समस्या भएपछि दिउँसो विराटनगर विमानस्थलमा जहाज अवतरण गराइएको हो ।
बुद्ध एयरका विराटनगरस्थित स्टेसन म्यानेजर कौशल भण्डारीका अनुसार उदयपुर त्रियुगा नगरपालिकाका ताराकिरण राईका ५ वर्षीय छोरा उडानका क्रममा सिकिस्त भएपछि दिउँसो करिब १२ बजेर ५९ मिनेटको समयमा अवतरण गराइएको हो।
५७ जना यात्रुसहित दिउँसो १२ बजेर २४ मिजेटमा उडान भरेको जहाजमा सवार ५ वर्षीय संयोगहाङ राईको श्र्वासप्रश्वासमा समास्या देखिएको थियो।
भण्डारीका अनुसार ‘जहाज अवतरण भएपछि, सिकिस्त बच्चालाई तत्काल एम्बुलेन्समा राखेर उपचारका लागि अस्पताल’ पठाइएको छ।
बच्चाको स्वास्थ्यमा एकाएक समस्या परेपछि जहाजलाई उडानकै क्रममा फर्काइएको उनको भनाइ छ।
प्रहरीका अनुसार विरामी नाबालकलाई उपचारका लागि विराटनगर अस्पताल एंव नर्सिङ होममा पुर्याइएको थियो।
यद्यपि चिकित्सकले नाबालक राईको दिउँसो करिब साढे १ बजे मृत्यु भएको घोषणा गरेका थिए ।
नाबालक राईको स्वास्थमा समस्या देखिएपछि मङ्गलबार नै परिवारले उपचारका लागि विराटमा लगेका थिए।
अस्पतालका बालरोग विशेषज्ञ डा. दीपराज अधिकारीका विरामी बच्चाको एक्स–रे अनुसार सानो आन्द्रामा समस्या थियो ।
आन्द्रामा रहेको समस्या खुलाउन शल्यक्रिया गर्नु पर्ने हुँदा परिवारले बुधबार काठमाडौ लैजाने निर्णय गरेका थिए ।
सोही क्रममा बच्चाको स्वास्थ्य थप गम्भीर भएको उनको भनाइ छ।
उनका अनुसार बुधबार अस्पतालले बिदा दिएको करिब ३ घण्टापछि बच्चालाई गाह्रो भयो भनेर पुनः अस्पताल ल्याइएको थियो ।
डा. अधिकारीले भने, ‘अस्पतालको आकस्मिक कक्षमा ल्याइपुर्याउँदा बच्चाको मृत्यु भइसकेको थियो।’
अर्कोतर्फ बुद्ध एयरले नाबालकलाई सामान्य अवस्थामै अस्पताल पठाइएको दाबी गरेको छ।
भर्खरै
लोकप्रिय
