पाटन- श्रीकृष्ण जन्माष्टमीका अवसरमा पूजा आराधनाका लागि आइतबार बिहानदेखि नै पाटन मन्दिरमा दर्शनार्थीको घुइँचो लागेको छ।
भक्तजनहरू बिहानैदेखि लाइनमा बसेर आफ्नाे पालाे कुरिरहेका छन् भने वृद्ध/वृद्धाहरूलाई लाइनमा बस्न नपर्ने व्यवस्था मिलाइएकाे छ। पूजाअर्चनाका लागि मन्दिरका दक्षिण र उत्तरतर्फ दर्शनार्थीका लागि लाइनको व्यवस्था गरिएको हाे।
हिन्दू धर्मावलम्बीले ‘श्रीकृष्णजन्माष्टमी’ पर्व आज देशभर भगवान् श्रीकृष्णको पूजा–आराधना गरी श्रद्धा–भक्तिपूर्वक मनाउँदैछन्।
ज्ञानयोग, कर्मयोग र भक्तियोगका प्रणेता भगवान् श्रीकृष्णको जन्म द्वापरयुगमा भाद्रकृष्ण अष्टमीको मध्यरातमा भएकाले आजको दिनलाई ‘श्रीकृष्णजन्माष्टमी’ र रातलाई ‘मोहरात्रि’ भनिन्छ।
यस दिन देशभरिका कृष्णमन्दिरमा भगवान् श्रीकृष्णको पूजा–आराधना, प्रवचन, भजनकीर्तन गर्नाका साथै विशेष गरी महिला, पुरुष ‘व्रत’ बसी रातभर जाग्राम बस्ने प्रचलन छ।
भक्तजनको लाइन व्यवस्थापनका लागि नेपाल स्काउट, ललितपुर महानगर प्रहरी परिचालित छन्।
तस्बिरहरू:
भर्खरै
लोकप्रिय
