सिमकोट – रानी सैनाका उच्च पाटनमा चौरी तथा अन्य पशुपालन गर्दै आएका गोठालाका बालबालिकाका लागि घुम्ती खोप शिविर सञ्चालन गरिएको छ। शिविरबाट खोप लगाउने उमेर समूहका बालबालिका र अन्य बिरामी लाभान्वित भएका हुन्।
सिमकोट गाउँपालिकाको आयोजनामा घुम्ती खोप शिविर सञ्चालन गरिएको हो। शिविरका लागि खर्क नजिकको स्याँडा स्वास्थ्य चौकीका स्वास्थ्यकर्मी परिचालन गरिएको थियो।
सिमकोट गाउँपालिका स्वास्थ्य शाखाका संयोजक नरबहादुर भण्डारीले सात जना बालबालिका खोप शिविरबाट लाभान्वित भएको बताए। उनका अनुसार खोप लगाउने बालबालिकामा डिपिटी दुई जना, जेई दुई जना, दादुरा रुबेला एक जना, पोलियो दुई जना, पिसिभी एक जना, एफआइपिभी दुई जना, रोटा भ्याक्सिन एक जना र टाइफाइड एक जना छन्। आमासँग खर्चमा लगिएका बालबालिकालाई १२ वटा खोप लगाइएको हो।
ती बालबालिकामा एकदेखि दुई पटक खोप लगाउने छुटेका थिए। त्यसैगरी ४३ जना अन्य बिरामीको शिविरमा उपचार गरिएको छ। जसमा २० जना महिला र २३ जना पुरुष छन्।
उनीहरू जेठदेखि खर्कमा बस्दै आएका थियो। सो शिविर सञ्चालन गर्न जनस्वास्थ्य निरीक्षक एवं स्याँडा स्वास्थ्य चौकीमा संयोजक लवी रावतको नेतृत्वमा तीन जना स्वास्थ्यकर्मी परिचालन गरिएको थियो। जसमा स्वास्थ्यकर्मी धिरन शाही र सपना बुढा रहेका थिए।
भर्खरै
लोकप्रिय
