जनकपुर – जनकपुरमा मंगलबार जानकी नवमी एवम् जानकी जन्मोत्सव भव्यताका साथ मनाईंदैछ ।
प्राचीन मिथिलाका राजा जनककी छोरी आदर्श नारी सीताको जन्म वैशाखको शुक्ल पक्ष नवमीका दिन भएको धार्मिक मान्यता अनुसार आजका दिन प्रत्येक वर्ष जानकी नवमी मनाउँने गरिन्छ ।
जानकी नवमीको अवसरमा बिहानैदेखि जनकपुरको जानकी मन्दिर, राम मन्दिर, जनक मन्दिर, लक्ष्मण मन्दिर लगायतमा पूजा गर्ने श्रद्धालुहरुको भीड लागेको छ ।
अल्लिअघिसम्म औपचारिकतामा मात्र सीमित हुने जानकी नवमी केही वर्ष यता विभिन्न कार्यक्रम गरी धुमधामसँग मनाउने गरिएको छ भने यस वर्ष विशेष कार्यक्रमको आयोजना गरिएको छ ।
सीताको जन्मोत्सव मनाउन नवदुल्ही झै सिंगारिएको जानकी मन्दिरमा यस वर्ष वैशाख ३ गतेदेखि १६ गतेसम्म १४ दिन जानकी महोत्सवको आयोजना गरिएको छ ।
जानकी महोत्सवको अवसरमा रामायण मेला, राम कथा, नवाह परायण पाठ र बधाई मंगल गान चलिरहेको छ । मन्दिरको बाहिरी र भित्री परिसरमा टेन्ट पण्डाल निर्माण गरेर धार्मिक प्रवचन र पूजापाठको काम भइरहेको छ ।
सीताको जन्मोत्सवमा सहभागी हुन एवम् पूजापाठ गर्न नेपाल तथा भारतका विभिन्न स्थानबाट श्रद्धालु भक्तजन तथा पर्यटक जनकपुर आएका छन् ।
यस्तै, जानकी मन्दिरको मुख्य कार्यक्रम जानकी नवमी रहेकाले भव्यता पूर्वक मनाउन लागिएको जानकी मन्दिरका सह–महन्थ रामरोशन दास वैष्णवले बताए ।
जानकी नवमीको अवसरमा मंगलबार दूधमती नदीमा सामूहिक स्नान समेत गरिएको छ । जानकी नवमीको दिन जनकपुरको दूधमति नदीमा स्नान गर्ने विशेष परम्परा छ, भने जानकी नवमीको अवसर पारेर दूधमति नदीमा विगत विशेष आरती गर्न पनि सुरु गरिएको छ ।
भर्खरै
लोकप्रिय
