काठमाडौँ – निर्माणाधीन मुग्लिन–नारायणगढ सडकखण्डमा दोस्रो चरणको कालोपत्रे पनि सकिएको छ ।
एक हप्ताअघि पहिलो चरणको कालोपत्रे सकिएर दिनभर गाडी चल्न थालेको सडकमा दोस्रो चरणको कालोपत्रे पनि सकिएको मुग्लिन–नारायणगढ सडक आयोजनाका सिनियर डिभिजन इन्जिनियर गोविन्द खनालले देश सञ्चारलाई जानकारी दिए ।
निर्माणाधीन साढे ३३ किलोमिटर मध्ये केही छिटफुट ठाउँमा मात्रै दोस्रो चरणको कालोपत्रे बाँकी रहेको उनले बताएका छन् ।
पहिलो चरणको कालोपत्रे गर्ने काम सकिएपछि गएको बुधबारदेखि नै यो बाटोमा गाडी दिनभर चल्न दिइएको थियो । त्यसअघि दिनको ६ घण्टा (बिहान १० देखि दिउँसो ४ बजेसम्म) गाडी रोकेर काम हुने गरेको थियो ।
आयोजनाका सिनियर डिभिजन इन्जिनियर खनालका अनुसार पहिलो चरणमा जस्तै दोस्रो चरणमा पनि ६ सेन्टिमिटरको कालोपत्रे गरिएको हो । योसँगै मुग्लिन–नारायणगढ सडक खण्डको मोटाइ १२ सेन्टिमिटरको भएको छ ।
अब अन्तिम चरणमा एस्फाल्ट कंक्रिट गरिने छन् । दोस्रो चरणको कालोपत्रे सकिएपछि यो भन्दा गुणस्तरको एस्फाल्ट कंक्रिटको काम अब हुने उनले जानकारी दिए ।
एस्फाल्ट कंक्रिट चार सेन्टिमिटरको हुनेछ । यसरी समग्रमा मुग्लिन–नारायणगढ सडक खण्डको सडकमा कालोपत्रेको मोटाइ १६ सेन्टिमिटरको हुनेछ ।
मुग्लिन–नारायणगढ सडक आयोजनाका सिनियर डिभिजन इन्जिनियर खनालले भने, ‘ठूला गाडी गुड्ने भएकाले बलियो बाटो बनाउनका लागि दुई चरणमा कालोपत्रे र अन्तिम चरणमा एस्फाल्ट कंक्रिट गर्न लागिएको हो ।’ उनले आउँदो असार मसान्तसम्ममा लगभग सबै काम सक्ने तयारी रहेको बताए ।
बाटो बनाइसक्नका लागि पछिल्लो पटक थपिएको समय जेठ १६ गतेसम्म थियो । तर काम पूरा भएको छैन । आउँदो असार मसान्तसम्ममा छिटफुट काम बाहेक अरु काम सकिने उनले बताएका छन् ।
भर्खरै
लोकप्रिय
