काठमाडौँ-मलेसियास्थित नेपाली दूतावासले गैरकानूनी रुपमा बसेका नेपालीलाई फर्काउन कन्सुलर सेवा सम्बन्धि एक दिने कार्यक्रम गर्ने भएको छ। कार्यक्रममा एकतर्फी यात्रा अनुमती पत्र जारी गर्ने दूतावासले जनाएको छ ।
आगामी असार ३० गते मलेसियाको पेनाङ्ग र जोहोरमा बिहान १० बजेदेखि कार्यक्रम हुनेछ । मलेसिया सरकारले आगामी अगष्ट ३० सम्म अवैधानिक भएर मलेसियामा काम गरिरहेका आप्रवासीलाई घर फर्किने समय सीमा तोकेको छ ।
घर फर्किने प्रक्रियामा रहेको अवैधानिक नेपालीलाई त्योदिन आवश्यक कागजात र दस्तुर लिएर आउन दूतावासले विज्ञाप्ति मार्फत अनुरोध गरेको छ । नेपाली नागरिकताको प्रतिलिपि, राहदानीको प्रतिलिपि, २ प्रति पासपोर्ट साइजको फोटो र १६० रिङ्गिट राजश्व लिएर जानु पर्नेछ ।
यसैबीच वैदेशिक रोजगार व्यवसायी संघले दूतावासले सहजीकरण गर्न लागेको प्रति खुशी व्यक्त गर्दै केहि सुझाव पनि दिएको छ । संघका अध्यक्ष रोहन गुरुङले शनिबार करार अवधि पूरा नगरेका नेपाली श्रमिकको हकमा सिफारिस गर्नु पहिले श्रमिकको राहदानीको सक्कल अवस्था र तलव लगायतका विषयमा स्पष्ट गर्न दूतावाससँग माग गरेका छन् ।
यस्ता कामदारको हकमा मलेसियाका रोजगारदाता र म्यानपावर व्यवसायीसँग पनि समन्वय गर्दा राम्रो हुने संघको भनाई छ।
भर्खरै
लोकप्रिय
