नेपालगञ्ज– नेपालगञ्जको बागेश्वरी मन्दिरमा पनि धुमधामका साथ छठ पूजा गरिएको छ। दुलहीझैँ सजाइएको मन्दिर परिसरमा रहेको पोखरीको घाटमा बसेर अस्ताउँदो सूर्यलाई अर्घ्य दिइएको छ।
पूर्वी तराई धुमधामका साथ मनाइने छठ पर्व पश्चिम तराईका जिल्लामा पनि व्यापक हुँदै गएको छ। बागेश्वरी मन्दिरमा पुगेका ठूलो संख्याले पोखरीमा पसेर अस्ताउँदो सूर्यलाई अर्घ्य दिएका हुन्।
खरना पूजा गरेपछि ब्रत बसेका ब्रतालुले विभिन्न परिकार बोकेर पूजा गरेका छन्। भोलि बिहान उदाउँदो सूर्यको पूजा गरेपछि ब्रत सकिन्छ।
छठलाई व्यवस्थित गर्न यहाँ छठ समिति गठन गरिएको छ। १५ सदस्यीय छठ समितिले घाटको सरसफाईदेखि बिजुली सजावट र भारतको कानपुर र इलाहवादबाट कलाकार ल्याएर भजनकीर्तन गराएको छ।
समिति सदस्य सञ्जय श्रीवास्तवले बागेश्वरी मन्दिरमा २५ वर्षदेखि छठको पूजा भइरहेको बताए। उनले पछिल्लो १० वर्षयता पूजा गर्नेको संख्या बढेको छ।
‘पहिला २–४ जनाले पूजा गर्थे, अहिले धेरै भएका छन्,’ श्रीवास्तवले भने, ‘छठको महत्व बढ्दै गएको छ।’ कात्तिक शुक्ल चतुर्थीदेखि सप्तमीसम्म मनाउने यो पर्वमा सूर्यदेवको आराधना, उपसना र पूजा गरिन्छ।
भर्खरै
लोकप्रिय
