महेन्द्र पार्कमा के हेर्न जाने ?

नेपालगञ्ज – बाहिरबाट नेपालगञ्ज आएका या फुर्सद निकालेका यहीका स्थानीय बासिन्दा महेन्द्र पार्कमा पुग्ने गर्दछन् । घरपरिवार, साथीसंगीसँग पार्कमा गएर त्यहाँका जनावर तथा चराचुरुङ्गी हेर्ने अधिकांशको धोको हुन्छ ।

तर दुर्भाग्य, पार्कमा न त विभिन्न जातका जनावर छन् न त चराचुरुङ्गी नै । महेन्द्र पार्कमा यतिबेला दुई वटा कृष्णासार, १५ वटा चित्तल, दुई वटा आष्ट्रिच, लबर चरा, खरायो र तीन वटा बाँदर छन् । केही समय अघिसम्म रहेको मयुर मरिसकेको छ । कृष्णासारको संख्या घटेको छ । धेरै ‘घर’हरु खाली भएपछि चौकीदार अस्लम रिजवीले आफ्नो घरबाट परेवा, कुखुरा, चाइनिज हाँस लगेर राखिदिएका छन् ।

कुखुरा, परेवा या बाँदर हेर्न महेन्द्र पार्क जाने त ? प्रश्न उठिरहेको छ । नेपालगञ्जका रैथाने अनिल श्रेष्ठ भन्छन्, ‘नेपालगञ्ज उपमहानगरपालिकाले राम्ररी व्यवस्थापन नगर्दा पार्क नाममात्रको पार्कका रुपमा परिणत भइरहेको छ ।’ नेपालगञ्जका मेयर धवलशमशेर राणाले पहिलो पटक मेयर हुँदा महेन्द्र पार्क बनाएर आन्तरिक पर्यटकीय स्थल बनाउने प्रयास गरेका थिए । अहिले दोस्रो पटक उनै राणा मेयर भएको बेलामा पार्क खण्डहरमा परिणत हुँदै गएको छ ।

नेपालगञ्जको घुम्ने ठाउँमध्येमा महेन्द्र पार्कलाई लिइन्थ्यो/लिइन्छ । महेन्द्र पार्कलाई कहिले ठेक्कामा दिने, कहिले आफूले सञ्चालन गर्ने उपमहानगरपालिकाको नीतिले गर्दा पार्क नामको पार्क बन्दै गएको हो । अझ एकपटक त पार्कलाई मासेर सिटी हल बनाउने आन्तरिक निर्णय भएर शहरी विकास तथा भवन डिभिजन कार्यालयले कन्सल्टेन झिकाएर माटोसमेत परीक्षण गरेको थियो । तर स्थानीयले चर्को विरोध गरेपछि सिटी हल बनाउने योजना परिवर्तन गरियो ।

यतिबेला महेन्द्र पार्क ‘प्रेमी’का लागि उपयुक्त ठाउँ बनेको छ । दश÷दश रुपैयाँको टिकट काट्ने र दिनभरी मायाप्रेमका गफ गर्ने थलो बनेको छ । बिहीबार एक सय २० वटा टिकट कट्यो । भ्यालेन्टाइन डे पनि परेकाले प्रायः जोडी नै आएका थिए । पार्कमा छेउछाउमा बनाइएको बस्ने ठाउँमा केटाकेटीहरु रमाइरहेका थिए । चौकीदार अस्लमले अरु दिन पनि युवायुवतीहरु नै आएर दिनभरी मज्जाले घुमेर जाने बताए ।

बुधबार एक सय ६० वटा टिकट कटेको थियो । मंगलबार एक सय ३० वटा । नजिकै रानीतलाउ पुनः सञ्चालनमा आएकाले बोटिङको मज्जा लिनेहरु त्यतातिर गएको हुन सक्ने चौकीदार अस्लमले आशंका गरे । पार्कमा जनावर र चराचुरुङ्गी नै छैन, के हेर्न आउने ? चौकीदार अस्लमले भने, ‘केटाकेटीहरु दिनभरी गफ गर्न आउँछन् । जनावर र चराचुरुङ्गी त एक बहानामात्रै हो ।’

नेपालगञ्जको बागेश्वरी मन्दिर, रानीतलाउ, महेन्द्र पार्क र बन्दै गरेको वाटर पार्क पर्यटकीय स्थल हुन् । महेन्द्र पार्कलाई पनि व्यवस्थित गर्दा पार्कको रौनकता बढ्ने स्थानीयवासी श्रेष्ठले बताउँछन् । उनले भने, पार्कलाई केटाकेटीको गफ गर्ने ठाउँमात्रै नभएर घरपरिवार, साथीसंगी, पाहुना आउदा देखाउने ठाउँको रुपमा विकास गर्नुपर्छ ।’