तिब्बती धर्मगुरु दलाइ लामा अहिले दिल्लीको अस्पतालमा उपचाररत छन् । स्वास्थ्यमा समस्या देखिएपछि उनलाई धर्मशालाबाट विमान मार्फत भारतको राजधानी दिल्ली लगिएको हो मंगलबार ।
उनको छातीमा संक्रमण देखिएको निजी सहयोगीले बताएका छन् । तर लामालाई क्यान्सर भएको हुन सक्ने अनुमान पनि गरिएको छ ।
उनका निजी सहयोगी तेन्जिङ ताक्ल्हाले धर्मगुरु लामालाई गम्भीर समस्या केही नरहेको र छातीमा देखिएको संक्रमणमा पनि सुधार भएको बताएको अन्तर्राष्ट्रिय सञ्चारमाध्यमले जनाएका छन् । ८३ वर्षका लामालाई अहिले डाक्टरको निगरानीमा राखिएको र स्वास्थ्यमा सुधार हुँदै गएको उनले बताएको छ ।
सन् १९५९ मा चीनबाट निर्वाशित भएका लामा त्यसयता भारतको उत्तरी पहाडी शहर धर्मशालामा बस्दै आएका छन् । धर्मशाला दलाइ लामाको हेडक्वाटर रहँदै आएको छ त्यसयता । तिब्बतलाई चीनबाट मुक्त बनाएर स्वतन्त्र देशको मान्यता स्थापित गर्न अभियान चलाएका कारण उनी निर्वासनमा परेका हुन् ।
गएको वर्षदेखि आफ्ना विदेश भ्रमण स्वास्थ्यको कारण देखाउँदै कटौटी गरेका दलाइ लामाको स्वास्थ्यमा सुधार आएको सहयोगी तथा उनका प्रवक्ता ताक्ल्हाले बताएका छन् ।
उनले भनेका छन्, ‘लामो दूरीको यात्रा थकान युक्त हुन्छ । साधारणयता उहाँको स्वास्थ्य राम्रो छ । तर खतरा नहोस् भनेर मात्रै अस्पतालमा राखिएको हो ।’
दलाइ लामाले सामान्यतया वर्षको सात महिना विश्वका विभिन्न क्षेत्र भ्रमण गरेर बिताउने गरेका थिए । उनले आफ्नो भ्रमणको क्रममा बुद्धधर्मको प्रचार गर्ने तथा चीनबाट स्वतन्त्र हुनका लागि तिब्बतीले गरिरहेको संघर्षबारे बताउने गरेका छन् । उनले अघिल्लो हप्ता नयाँ दिल्लीमा शिक्षा क्षेत्रमा संलग्न भएका व्यक्ति तथा विद्यार्थीहरुको सम्मेलनलाई सम्बोधन गरेका थिए ।
दलाइ लामा अझै केही दिन अस्पतालमै रहने उनको निजी सचिवालयले जनाएको छ । अस्पतालले भने विरामीको गोपनियताका कारण दलाइ लामाको स्वास्थ्य अवस्थाबारे केही जानकारी दिन नमिल्ने बताएको समाचार संस्था रोयटर्सले जनाएको छ ।
भारतमा अहिले झण्डै एक लाखको हाराहारीमा तिब्बतीको बसोबास छ । गएको महिना (मार्च) मा रोयटर्ससँग आफ्नो उत्तराधिकारी भारतमै फेला पर्ने बताएका थिए । चीनले आफ्ना उत्तराधिकारीको रुपमा नाम दिएमा त्यसलाई स्वीकार गर्न भनेका थिए ।
चीनले सन् १९५० मा तिब्बत माथि नियन्त्रण कायम गरेको थियो ।
भर्खरै
लोकप्रिय
