विशेष गरी विकसित देश या उच्च आय भएका देशका अधबैँसे व्यक्तिको मृत्युको कारण कार्डिओभास्कुलर डिजिज भन्दा बढी क्यान्सर रहेको देखिएको छ ।
पछिल्लो एक अध्ययनमा उच्च आय भएका देशका अधबैँसे व्यक्तिको मृत्युका कारणहरुको सूचिमा क्यान्सर अघि आएको हो । यसअघि कार्डिओभास्कुलर डिजिज मृत्युको प्रमुख कारण थियो ।
अहिले पनि कार्डिओभास्कुलर डिजिज मृत्युको प्रमुख कारण मध्ये मै पर्छ तर त्यो भन्दा क्यान्सरले धेरैको ज्यान लिएको देखिएको अनुसन्धान प्रतिवेदनमा उल्लेख छ ।
विश्वव्यापी रुपमा भने अझै पनि अधबैँसे व्यक्तिहरुको मृत्युको प्रमुख कारणमा मुटु सम्बन्धी समस्या र स्ट्रोक रहेका छन् । तर धनी देशका व्यक्तिहरुमा भने क्यान्सर पहिलो कारण देखिएको हो ।
यी देशका अधबैँसे व्यक्तिको मृत्युको कारण कार्डिओभास्कुलर डिजिज भन्दा क्यान्सर साढे दुई गुणा बढी रहेको देखिएको अनुसन्धानकर्ताले बताएका छन् ।
तर कमजोर आय भएका देशका सोही उमेर (अधबैँसे) का व्यक्तिको मृत्युको प्रमुख कारण भने कार्डिओभास्कुलर डिजिज नै देखिएको छ । यी देशमा सो उमेर समूहका व्यक्तिमा मृत्युको कारण क्यान्सर भन्दा कार्डिओभास्कुलर डिजिज तीन गुणा बढी रहेको छ ।
द ल्यान्डसेट जर्नलमा प्रकाशित अनुसन्धानमा अनुसन्धानकर्ताले २१ देशका मानिसमा अध्ययन गरेका हुन्।
क्यानडाको म्याकमास्टर विश्वविद्यालयका अनुसन्धानकर्ताको अगुवाईमा भएको अनुसन्धानमा एक लाख ६० हजार मानिस सहभागी थिए । अनुसन्धानकर्ताले सन् २००५ देखि २०१६ को बिचमा यी व्यक्तिहरुमाथि अध्ययन गरेका हुन् ।
अनुसन्धानमा सहभागी व्यक्तिहरु अनुसन्धान थालनी हुँदा ५० वर्षका थिए । यो अवधिमा ११ हजार भन्दा बढी व्यक्तिको निधन भयो । जसमा कम आएका भएका देशका व्यक्तिको मृत्यु उच्च आय भएका देशका व्यक्तिको भन्दा चार गुणा बढी देखियो ।
तर कारणमा उच्च आय भएका देशका व्यक्तिमा क्यान्सर पहिलो नम्बरमा देखियो । दुई हजार व्यक्तिको मृत्युको कारण खुल्न सकेन ।
भर्खरै
लोकप्रिय
