काठमाडौँ – काठमाडौँको कागेश्वरी मनोहरा नगरपालिका वडा नं. १ गागलफेदीको कागेश्वरी महादेव मन्दिरमा मेला लाग्ने भएको छ। भाद्र शुल्क अष्टमी (कागेअष्टमी) देखि तीन दिनसम्म लाग्ने मेलामा विविध कार्यक्रमहरु गरिनेछ।
नगरपालिकाको नाम नै कागेश्वरी महादेव मन्दिरको नामबाट राखिएको हुँदा मेलालाई नगरपालिकाले आफ्नो पहिचानसँग जोडेको छ।
भदौ १९ गते कागेश्वरी मन्दिरको महत्वका बारेमा कवि गोष्ठि गरी साहित्यक कार्यक्रम सञ्चालन गर्ने, २० गते कागेअष्टमीका दिन कागेश्वरी महामेलाको उद्घाटन गर्ने र २१ गते मन्दिरको सरसफाइ गर्ने तय भएको छ।
मेलामा ५० हजारभन्दा धेरै दर्शनार्थी आउने अनुमान गरिएको छ। कागेअष्टमीका दिन नगरपालिकाले नगरपालिकाभित्र सार्वजनिक विदा दिने निर्णय गरेको छ।
किंवदन्ती अनुसार परापूर्वकालमा कागले गाईको दूध पहरामा रहेको शिवलिङ्गमा चढाउँदै गरेको गोठालाले देखेपछि त्यहाँ खोस्रेर हेर्दा महादेवको मूर्ति फेला परेकाले त्यसै बेलादेखि त्यस मन्दिरको नाम कागेश्वरी महदेव मन्दिर रहन गएको जनविश्वास रहेको छ।
यस्तै रसुवाको गोसाइँकुण्डमा मेला भर्ने दर्शनार्थीले त्यहाँको पवित्र जल कागेश्वरी महादेवलाई चढाउँदा आफ्नो इच्छा पूरा हुने जनविश्वास रहेको छ।
पर्यटन प्रवर्धन गर्ने हिसाबले नगरपालिकाले २ सय २७ किलो धातुको कागको मूर्ति स्थापना गरेको छ। कागेश्वरी महादेवको मन्दिरमुनि र माथि छहरा र झरना छन्।
भर्खरै
लोकप्रिय
