भक्तपुर – ऐतिहासिक सम्पदाको अवलोकन गर्न काठमाडौँ महानगरपालिकाको निमन्त्रणमा आएको विदेशी टोलीले भक्तपुरको सम्पदाको अवलोकन गरेको छ । उक्त टोलीले आइतबार भक्तपुरको विश्व सम्पदा क्षेत्रमा पर्ने दरबार क्षेत्रलगायतको अवलोकन भ्रमण गरेको हो ।
चीनको ‘लाञ्जाउ कमिटी अफ द सिपिपिसिसी’ का उपाध्यक्ष ज्याङ् सिओहाङले नेपाल भ्रमणबाट आफूहरु उत्साहित भएको बताए । “नेपाल कला, संस्कृति र सम्पदाको धनी देश रहेछ, काठमाडौँ बसाइ रमाइलो भयो, इन्द्रजात्रामा नेपाली जनताको उत्साह तथा नेपालीको सम्पदाप्रतिको सम्मान देखेर म निकै प्रभावित भएँ”, उनले भने ।
उनले आफूले यहाँको सांस्कृतिक सम्पदाबारे सुनेको तर यहाँ आएर हेर्दा निकै प्रभावित भएको बताए । काठमाडौँ महानगरपालिकाका प्रमुख विद्यासुन्दर शाक्यसँगै चन्द्रागिरिको अवलोकन भ्रमणपछि सिओहाङ नेतृत्वको टोलीले स्वयम्भूको समेत अवलोकन भ्रमण गरेको थियो ।
यस्तै भक्तपुरको अवलोकन भ्रमणमा आएका भारतको उत्तरी दिल्ली नगरपालिकाका प्रमुख सरदार अवतार सिंहले नेपालको प्राकृतिक सम्पदाबाट प्रभावित भएको बताए । उनले यहाँका सम्पदाबारे आफ्नो नगरका बासिन्दालाई जानकारी गराउने बताए । “पर्यटन वर्षमा नेपाल भ्रमण गर्न सन्देश प्रवाह गर्छु”, उनले भने । विज्ञान सङ्ग्रहालयको अवलोकनपछि आफू झन प्रभावित भएको भन्दै सिंहले नेपाल भ्रमण वर्ष २०२० को सफलताको कामना गरे ।
यस्तै भुटानको थिम्पु नगरका प्रमुख किन्ले दोर्जीले नेपाल सम्पदा संरक्षण र विकासको गतिमा अघि बढेको भन्दै खुशी व्यक्त गरे । यहाँको संस्कृतिबाट आफू प्रभावित भएको दोर्जीले बताए । काठमाडौँ महानगरपालिकाका प्रमुख शाक्य, उपप्रमुख हरिप्रभा खड्गी श्रेष्ठसहित विदेशी पाहुनाले भक्तपुरको सांस्कृतिक सम्पदाको भ्रमण गरेका हुन् ।
प्रमुख शाक्यले यहाँको पर्यटन क्षेत्रलाई उद्योगका रुपमा विकास गर्न र इन्द्रजात्रालाई विश्वसामू चिनाउने उद्देश्यले विदेशी पाहुनालाई आमन्त्रण गरिएको बताए । “विदेशी पाहुनाको भ्रमणले पर्यटन प्रवद्र्धनमा सघाउ पुग्छ” उनले भने । विदेशी टोलीलाई भक्तपुर नगरपालिकाका प्रमुख सुनिल प्रजापति, उपप्रमुख सर्जनी जोशीसहितको टोलीले स्वागत गरेको थियो ।
भर्खरै
लोकप्रिय
