काठमाडौँ – नेपालीहरुको महान चाड बडा दशैं सुरु भएको छ । यसै अवसर पारेर आईतबार काठमाडौंको हनुमानढोकास्थित दसैँ घरमा घटस्थापना गरिएको छ ।
आइतबार बिहान दसैँ घरका गुरु ईश्वरप्रसाद अधिकारीले श्री महकाली, श्री महालक्ष्मी र महाशक्ति स्वरुपा दूर्गा भवगतीको आराधनासहित जमरा रोपण गरी दसैँ घरमा घटस्थापना गरेका हुन् । घटस्थापनालाई दसैँको पहिलो दिनको रुपमा लिइन्छ ।
दसैँ घरमा सबैको दीर्घायू, आरोग्य, सदगुण, सत्शिक्षाको कामना गर्दै दीप, गणेश र कलशको पूजा गरी घटस्थापना गरी जमरा राखिएको गुरु अधिकारीले जानकारी दिएका छन् ।
हनुमानढोका दरबारमा आइतबार बिहान घटस्थापनाको क्रममा हर्ष बढाईँ गर्दै नेपाली सेनाको टुकडी। तस्बिर : सुलभ श्रेष्ठ/देश सञ्चार
बिहान १० बजेर ३५ मिनेटको शुभसाईतमा दसैँघरमा घटस्थापना गरिएको हो । त्यस अवसरमा नेपाली सेनाको एक टुकडीले तोप पड्काएर हर्ष बढाई गरेको थियो भने दसैँ घरमा शंख, घण्टा र डमरु बजाएर दूर्गा भगवतीको पूजा, आराधना गरिएको थियो ।
घटस्थापनाको क्रममा मंगलधुन बजाउँदै कलाकार। तस्बिर : सुलभ श्रेष्ठ/देश सञ्चार
दसैँको पहिलो दिन वैदिक विधिपूर्वक द्धीप, गणेश र कलशको पूजा गरी जौको जमरा राख्ने गरिन्छ । यसरी विधिपूर्वक स्थापना गरिएको घडामाथि शक्ति स्वरुपा दूर्गा भगवतीको पूजाआराधना गरिने भएकाले त्यस दिनलाई घटस्थापना पनि भन्ने गरिएको हो ।
घटस्थापनाको दिन रोपिएको जमरालाई विजया दशमीको दिन शक्तिकी देवी दूर्गा भगवतीको प्रसादको रुपमा ग्रहण गर्ने गरिन्छ ।
भर्खरै
लोकप्रिय
