जनकपुरधाम – छठ पर्व बिहीबारदेखि सुरु भएको छ । बजारमा छठमा प्रयोग हुने फल केरा किन्नेहरुको भिड लागेको छ । छठ पर्वको मुख्य दिन शनिबार चाहिने केरा किन्नेहरुको भीड लागेको छ ।
तर यसपटक माग अनुसारको केराको आपूर्ति नहुँदा समस्या भएको छ । यसले गर्दा उपभोक्तहरु दोब्बर मूल्य तिरेर केरा किन्न बाध्य भएका छन् । छठ पर्वमा केरा महत्वपूर्ण फल हो ।
फलफुल मण्डीमा केरा किन्नका लागि पुगेका जनकपुरधाम उपमहानगरपालिका वडा नं. १२ का गुड्डू हाथीले पछिल्लो पटक केराको एक घरीको लागि ३५० रुपैयाँ तिरेकोमा अहिले ६०० रुपैयाँ तिर्नु परेको बताए ।
धनुषा जिल्लामा छठ पर्वको लागि चम्पा केरा, मिर्चमान केरा र गोपाल केरा आउने गर्दछ । तर यस पटक गएको वर्ष भन्दा करिब ५० प्रतिशतले केराको आयातमा कमी आएपछि केराको मूल्यमा वृद्धि भएको व्यवसायीले बताए ।
जनकपुर फलफूल तथा तरकारी व्यवसायी संघका निवर्तमान महासचिव रवीन्द्रकुमार साहले यसपटक केराको बजार मूल्य अत्याधिक बढेको स्वीकार गरेका छन् । उनका अनुसार बजारमा माग अनुसारको केराको आपूर्ति नहुँदा बजारमा केराको मूल्य बढेको हो ।
छठ पर्वकै लागि जनकपुरधाम लगायत धनुषाको अन्य मन्डीमा १ सय ५० ट्रक केराको माग रहेपनि यसवर्ष ८० ट्रक केरा मात्रै आयात भएको रवीन्द्रकुमार साहले बताए ।
भर्खरै
लोकप्रिय
