काठमाडौँ – साउन महिनाको पहिलो सोमबार (आज साउन ५ गते) भवगान शिवको विशेष पूजा आराधना गरी शिवभक्तहरुले वर्त बसेर मनाउँदै छन् ।
यो वर्ष कोरोना भाइरसको महामारी नियन्त्रणका लागि सरकारले लागु गरेको लकडान केही खुकुलो भए पनि मठ मन्दिर बन्द नै रहेकाले दर्शनार्थी शिवालयहरुमा निकै कम गएका छन् ।
तर बिहानैदेखि चोखो भएर शिवको विशेष आराधना भने भइरहेको छ । साउन महिनाको सोमबारलाई शिव भगवानको व्रत बस्नका लागि सर्वोत्तम दिन मानिन्छ ।
सूर्य मिथुन राशीबाट कर्कट राशीमा प्रवेश गरेर दक्षिणायन सुरु भएको महिना साउन भगवान शिवको प्रिय महिना मानिन्छ । भगवान शिवले सूर्य र चन्द्र दुवैलाई धारण गर्नु भएकाले चन्द्रशेखर पनि भनिन्छ । चन्द्रशेखर भगवान शिवका हजार नाममध्ये एक हो ।
भगवान शिवको प्रिय महिना साउन र बार सोमबार भएकाले यस दिन व्रत गरी पूजाआजा गर्ने एवं नदी, ताल, तलाउलगायत पवित्र तीर्थस्थलबाट जल ल्याएर चढाउने परम्परा रहेको छ । यसो गरेमा मनोकांक्षा पूरा हुने धार्मिक विश्वास छ । तर यो वर्ष अधिकांश व्रतालूले घरमै बसेर आराधना गर्ने छन् ।
साउने सोमबारको व्रत दाम्पत्य जीवन, पारिवारिक एवं सन्तान र परिवारको कल्याण तथा सुख शान्तिका लागि पुरुष महिला दुवैले गर्नुपर्ने शास्त्रीय वचन रहेको छ ।
मानव शरीर पृथ्वी, जल, तेज, वायु र आकाश गरी पञ्चत्वले बनेको छ । यसमध्येमा पृथ्वी तत्व शरीरमा धेरै हुन्छ । यसैले पृथ्वीमा हरियाली छाएका बेला मानिसले पनि हरियो पहिरन लगाएर साउने सोमबार मनाउने गर्छन् । यसो गरेमा प्रकृतिसँगको तादात्म्यता प्राप्त हुने धार्मिक विश्वाससमेत छ ।
साउने सोमबार पशुपतिनाथ मन्दिरमा सामान्य अवस्थामा झण्डै एक लाख दर्शनार्थी पुग्ने गर्छन् । तर यो वर्ष कोरोना भाइरसको महामारीका कारण लागु भएको लकडाउन र मानिसहरु भेला हुन नपाउने सरकारी नियमका कारण सर्वसाधारणका लागि पशुपतिनाथ मन्दिर खुला नगरिएको पशुपति क्षेत्र विकास कोषले जनाएको छ ।
साउनको पहिलो सोमबारका लागि विशेष व्यवस्था नगरिएको पशुपति क्षेत्र विकास कोषले जनाएको हो । कोषका प्रवक्ता भोला सिटौलाका अनुसार साउने सोमबार पनि नित्य पूजा मात्रै हुने र दर्शनार्थीका लागि खुला गरिने छैन ।
उनले देश सञ्चारसँग भने, ‘अहिलेको परिस्थिति विषम छ । सरकारले लागु गरेको नियम मान्नु हाम्रो पहिलो प्राथमिकता हो । सरकारले मठ मन्दिर खुला गर्ने स्वीकृति दिएको छैन । सोही कारण यो वर्षको साउने सोमबार पशुपतिनाथ भक्तजनका लागि खुला हुँदैन ।’
उनले थप प्रष्ट पार्दै भनेका छन्, ‘अहिले मन्दिर बन्द छ । सोमबार पनि खुला हुँदैन । तर सरकारले मन्दिर खुला गर्ने निर्णय गरेमा साउनका अरु सोमबार दर्शन गर्न पाइने हुन सक्छ । त्यसका लागि हामीले तयारी गरेका छौँ ।’
गत वर्ष साउनको पहिलो सोमबार झण्डै एक लाख दर्शनार्थीले पशुपतिको दर्शन गरेको भए पनि यो वर्ष घरबाटै मनले सम्झेर पूजा गर्न आग्रह कोषले गरेको छ ।
मन्दिर परिषरमा पस्न नपाए पनि बाहिरबाट गजुरको दर्शन गर्न चाहनेले आफू अनुकुल व्यवस्था गर्न सक्ने जनाइएको छ ।
यो वर्षको पहिलो साउने सोमबार औँसी पनि परेकाले थप विशेष महत्व छ । दर्शनको व्यवस्था नभए पनि नित्यसँगै औँसीको विशेष पूजा मन्दिरका भट्टहरुले गर्ने कोषले जनाएको छ ।
भर्खरै
लोकप्रिय
