जाति, भाषा र संस्कृतिको संरक्षण देशको समृद्धिको आधार होः प्रचण्ड

काठमाडौँ– पूर्व प्रधानमन्त्री एवं नेपाल कम्युनिष्ट पार्टी (नेकपा)का अध्यक्ष पुष्पकमल दाहाल ‘प्रचण्ड’ले जाति, भाषा, धर्म, संस्कृति र सभ्यताहरुको संरक्षण र विकास देशको समृद्धिको आधार भएको बताएका छन्।

दसैँ, तिहार, छठ, नेपाल संवत् लगायतका चाडपर्वहरुको अवसरमा शुभकामना व्यक्त गर्दै उनले यस्तो बताएका हुन्।

‘विविधतायुक्त सांस्कृतिक ऐक्यवद्धता हामी नेपालीहरुको मौलिक विशेषता हो। सबै जाति, भाषा, धर्म, संस्कृति र सभ्यताहरुको संरक्षण र विकास देशको समृद्धिका आधारहरु हुन्,’ उनले शुभकामना सन्देशमा भनेका छन्।

यस्तै कोरोना भाइरसको महामारीको विषम परिस्थितिमा स्वास्थ्य सुरक्षाका सबै प्रकारका मापदण्डहरुको पालना गर्दै चाडपर्व मनाउन पनि उनले आग्रह गरेका छन्।

यस्ता साँस्कृतिक पर्वहरुले आपसी सहिष्णुता, भातृत्व र भावनात्मक एकता पैदा गर्ने दाहालको भनाइ छ।