नेपालगञ्ज-नेपाल र भारतका मन्त्रीले नेपालगञ्जमा एकीकृत जाँच चौकीको शिलान्यास गरेका छन्।
नेपालका शहरी विकास मन्त्री कृष्णगोपाल श्रेष्ठ र भारतका बाणिज्य तथा उद्योग मन्त्री पियूष गोयलले नेपालगञ्जको दशगजा नजिक बन्न थालेको एकीकृत जाँच चौकीको शिलान्यास गरेका हुन् । यहाँ आयोजित एक कार्यक्रमका बीचमा नेपालका मन्त्री श्रेष्ठ र भारतका मन्त्री गोयलले भिडियो कन्फ्रेसमार्फत चौकीको शिलान्यास गरेका हुन् ।
एकीकृत जाँच चौकीको शिलान्यास गर्दै नेपालका शहरी विकास मन्त्री श्रेष्ठ र भारतका बाणिज्य तथा उद्योग मन्त्री गोयलले एकीकृत जाँच चौकीको निर्माणपछि नाकामा सहज हुने बताए । एक अर्काको सहयोग आदान प्रदानले नेपाल र भारतका बीचमा आपसी समझदारी र भाइचारा बढाउने मन्त्रीद्वयको विश्वास थियो ।
भारतले १५ वर्षअघि नेपालका चार ठाउँमा एकीकृत जाँच चौकी निर्माण गरिदिने सम्झौता गरेको थियो । त्यही सम्झौता अनुसार वीरगञ्ज र विराटनगर एकीकृत जाँच चौकी निर्माण भइसकेका छन् । नेपालगञ्ज र भैहरवामा बन्न बाँकी नै रहेको छ ।
नेपालगञ्जमा दुई अर्ब ३५ करोडको लागतमा एकीकृत जाँच चौकी निर्माण हुन थालेको हो। ८७ विगाह जमिनमा चौकी बन्दैछ ।
शिलान्यास कार्यक्रममा भने सांसद महेश्वर गहतराज, प्रदेश सांसदद्वय बाबुराम गौतम र मो. याकुव अन्सारी नेपालगञ्जका मेयर डा. धवलशमशेर राणा, प्रमुख जिल्ला अधिकारी रामबहादुर कुरुम्बाङलगायतको उपस्थिति थियो । भूमिपूजन गरेर चौकीको शिलान्यास गरिएको छ। चौकी दुई वर्ष भित्र बनिसक्ने भनिएको छ।
भर्खरै
लोकप्रिय
