काठमाडाैँ – नेपाल बार काउन्सिलले कोरोना महामारीका कारण अधिवक्ता लाइसेन्सको परीक्षाको पूर्णाक ४०० बाट १०० मा झारेको छ।
अधिवक्ताको २८औं परिक्षा गत वैशाखमै हुुनुपर्ने भए पनि कोरोना महामारीका कारण काउन्सिलले आउँदो मंसिर २० गते एक दिन मात्र गर्ने भएको हो।
काउन्सिलका सचिव रामहरी काफ्लेका अनुसार यसअघि १०० पूर्णाकका चारवटा विषयको परिक्षा हुने गरेकोमा यसपटक सबैलाई एकीकृत गरी चार घण्टा दिएर परिक्षा लिन लागिएको हो।
मंसिर २० गते दिउँसो १२ बजेदेखि सुरु हुने परिक्षा ४ बजेसम्म चल्नेछ। काफ्लेका अनुसार ५/५ अंकका १२ वटा र मिसिल अध्ययनसँग सम्बन्धित ४० अंकको दुईवटा प्रश्न सोधिनेछ।
परीक्षामा सहभागी हुँदा परिक्षार्थीले कोरोनाबाट बच्नका लागि अधिकतम स्वास्थ्य सुरक्षाको प्रबन्ध गर्नुपर्नेछ। जाँचमा सहभागी हुन आउँदा परिक्षार्थीले फेस सेड, मास्क, हातमा लगाउने सर्जिकल पञ्जा लगाउनुपर्ने, अनिवार्य रुपमा सेनिटाइजर बोक्नुपर्ने नियम छ।
स्वास्थ्य सचेतताका उपाय अवलम्बन नगरी आउने परिक्षालाई सहभागी हुन नदिने काफ्लेले जारी गरेको सूचनामा उल्लेख छ।
काउन्सिलले आइसोलेसनमा बसेका विद्यार्थीलाई छुट्टै हलमा राखेर परिक्षा दिन पाउने व्यवस्था गर्ने जनाएको छ। त्यसका लागि अघिल्लो दिनसम्म जानकारी गराउनुपर्ने सूचनामा उल्लेख छ।
काउन्सिलले प्रवेश परिक्षा मंसिर ११ गतेदेखि वितरण गर्ने जनाएको छ। अधिवक्ताको २८ औं तहको परिक्षाका लागि गत फागुन १० गते फर्म आह्वान गरेको थियो।
भर्खरै
लोकप्रिय
