कसैले उक्साए जवाफ दिन भारत सक्षम छः मोदी

भारतका प्रधानमन्त्री नरेन्द्र मोदीले यदि कसैले भारतलाई उक्साए त्यसको कडा जवाफ दिने बताएका छन्।

उक्साएपछि कडा जवाफ दिन भारत सक्षम रहेको पनि उनले बताएका छन्। मोदी सेनाका जवानसँग दीपावली मनाउन जैसलमेरको लोङ्गेवाला पुगेका थिए।

सेनाका जवानलाई बधाई दिएपछि मोदीले चीनतर्फ इसारा गर्दै भने, ‘आज पूरा विश्व विस्तारवादी शक्तिलाई लिएर चिन्तित छ। यो एक प्रकारले मानसिक विकृति हो र यसले १८ औँ शताब्दीको सोचलाई दर्शाउँछ।’

उनले अघि भने, ‘भारत अरुको कुरा सुन्ने र आफ्नो कुरा सम्झाउने नीतिमा विश्वास गर्छ तर यदि कसैले उक्साउँछ भने प्रचण्ड जवाफ दिन सक्षम छ।’

भारत र चीनबीच सीमा विवाद जारी रहेको बेला मोदीको यो सन्देश आएको हो।