कैलालीमा ट्रक पल्टिँदा चारजना घाइते

धनगढी – कैलालीमा ट्रक पल्टिँदा चारजना घाइते भएका छन् । चुरे गाउँपालिका–६ डुम्रेनीमा मंगलबार ट्रक पल्टिँदा चालकसहित चारजना घाइते भएका हुन् ।

डडेल्धुराको जोगबुढाबाट अत्तरियातर्फ आइरहेको से ७ ख १२९ नम्बरको ट्रक अनियन्त्रित भई पल्टिएको सुदूरपश्चिम प्रदेश ट्राफिक प्रहरी कार्यालय अत्तरियाले जनाएको छ ।

घाइते हुनेमा डडेल्धुराको परशुराम नगरपालिका–४ बस्ने ट्रक चालक २९ वर्षीय दानबहादुर कामी, सोही ठाउँका १८ वर्षीय दशरथ सिलाल, ३८ वर्षीय नरेन्द्र बोहरा र २० वर्षीय करन कामी रहेका छन् ।

घाइते करन कामीको अवस्था गम्भीर रहेको प्रहरीले जनाएको छ । घाइते सबैलाई उपचारका लागि अत्तरियाको पद्मा अस्पताल पठाइएको छ ।