दाङ– लुम्बिनी प्रदेशका मुख्यमन्त्री शंकर पोखरेलले सरकारले अब विकास माग्दै धाउने प्रवृतिको अन्त्य गर्दै योजनाको आधारमा सबै ठाउँमा विकास पुर्याउने बताएका छन्।
बिहीबार दाङमा पुल शिलान्यासका क्रममा मुख्यमन्त्री पाेखरेलले यस्तो बताएका हुन्।
‘अब विकास माग्दै धाउने प्रवृत्तिको अन्त्य गर्दैछौँ। सरकारले योजनाको आधारमा सबै ठाउँमा विकास पुर्याउँछ,’ उनले भने, ‘विकास भएन भनेर धाउनु पर्दैन।’
मुख्यमन्त्री पोखरेलले विरोधको राजनीतिले कहीँ नपुर्याउने बताउँदै उनले विकास र समृद्धिको मुद्दामा सबै एक ठाउँमा उभिन जरुरी रहेको बताए।
मुख्यमन्त्री पोखरेलले बिहीबार दाङका विभिन्न स्थानमा तीन ओटा पक्की पुलको शिलान्यास गरेका छन्। उनले तुलसीपुर उपमहानगरपालिकामा पर्ने पातुखोला, घोराही उपमहानगरपालिकामा पर्ने कटुवा खोला र राप्ती गाउँपालिकामा पर्ने दोलही खोलामा पक्की पुलको शिलान्यास गरेका हुन्।
पातुखोला पुल बनाउन ८ करोड ३१ लाख, कटुवा खोला पुलको लागि ३ करोड ८२ लाख, दोलही खोला पुल बनाउन ५ करोड २० लाख बजेट रहेको छ। सिस्ने खोलामा पुल निर्माण कार्य जारी छ। यो पुल बनाउन १९ करोड ६० लाख बजेट छ। दंगिशरण गाउँपालिकाको माया खोलामा पुल बनाउन ३ करोड ५० लाख बजेट छ।
यसैगरी दाङमा अन्य ६ विभिन्न स्थानमा पक्की पुल बनाउन डीपीआर तयार भएको पूर्वाधार विकास कार्यालयका प्रमुख वासुदेव भण्डारीले जानकारी दिए।
पुल शिलान्यास कार्यक्रममा मुख्यमन्त्री पोखरेलसहित भौतिक पूर्वाधार विकासमन्त्री वैजनाथ चौधरीको समेत उपस्थिति रहेको थियो।
उनले स्थायी राजधानी क्षेत्रमा व्यवस्थित र नमुना शहर बनाउन अन्तर्राष्ट्रिय विज्ञहरुको सहयोगमा गुरुयोजना निर्माणको प्रक्रिया अघि बढेको जानकारी दिए।
भर्खरै
लोकप्रिय
